Монгол Улсын Ерөнхийлөгч У.Хүрэлсүхийн санаачилсан “Тэрбум мод”, “Хүнсний хувьсгал” үндэсний хөдөлгөөнүүдийн бодлого чиглэлийг хэрэгжүүлэхэд иргэд, аж ахуй нэгж байгууллагууд өөрсдийн хувь нэмрийг оруулсаар байна. Тодруулбал, Дархан-Уул аймгийн иргэдэд алимны мод тарьж ургуулах онол, практик хосолсон сургалтыг аймгийн Ажил олгогч эздийн холбооноос зохион байгуулав.

Дархан-Уул аймаг газар тариалангийн бүс нутаг. Дотоодын төмс, хүнсний ногооны нийт хэрэгцээний 20 гаруй хувийг дангаараа хангадаг. Сүүлийн жилүүдэд зөвхөн хүнсний ногооноос гадна олон төрлийн жимс жимсгэнэ тариалдаг иргэн, аж ахуйн нэгжүүд нэмэгдсээр байна.

“Булган голын алим” ХХК-ийн захирал, тэргүүний тариаланч Х.Балжинням алим тарих аргачлалаа сургалтад хамрагдсан 180 гаруй хүнд зааж өгч, 15 жил алимны мод үржүүлж, алим тарьж ургуулсан туршлагаасаа хуваалцлаа.

Нэг өрх айл алимны 100 мод тарихад 5 жилийн дараа нэг модноос дунджаар 40 кг алим хураан авч зах зээлд нийлүүлэхэд 40 сая төгрөг олох боломжтой. Ингэж өрхийн үйлдвэрлэлийг нэмэгдүүлснээр эдийн засгийн хувьд ч, ажлын байрыг нэмэгдүүлэхэд ч ихээхэн ач холбогдолтой.

Өргөн агуулгаараа эх орны хөрсөнд тарьж ургуулсан экологийн цэвэр бүтээгдэхүүн нь эрүүл Монгол хүний төлөө өрхийн үйлдвэрлэгчид, ААН-үүдийн хийж хэрэгжүүлж болох хамгийн үр ашигтай үйл ажиллагаа гэж ойлгож болох юм.

Монгол орны байгаль, цаг агаарын онцлог нь алим жимс тарьж ургуулахад нэн тохиромжтой. 10 сая алимны мод тарьж ургуулахад л дотоодын хэрэгцээг 100 хувь хангах боломжтой юм байна.