“Алтан намар-ургацын баяр-2023” үйл ажиллагаа 2023 оны есдүгээр сарын 17-ны өдөр Өмнөговь аймгийн Булган суманд зохион байгууллаа.
Тус баярыг Булган сумын газар тариалан эрхлэгчид, иргэд хөдөлмөрчдийн дунд жил бүр уламжлал болгон хийдэг.
Алтан намар-ургацын баярын үеэр ерөнхий боловсролын сурагчдын дунд “Байгалийн өгөөж” үйл ажиллагааг зохион байгуулж, ангиуд тарьсан ногоогоороо хүнсний бүтээгдэхүүн хийж өрсөлдсөн бол ногоочдын дунд волейболын тэмцээн, хүнсний бүх төрлийн ногоонуудаас хамгийн том шилдгийг тодруулах, даршилсан өргөст хэмх, саладны амт чанарыг тодруулах, автомашинаа ногоогоор чимэглэх зэрэг сонирхолтой уралдааныг зохион явуулж шилдгүүдээ шалгаруулжээ.
Хамгийн том тарвас 12,6 кг байсан бол амтат гуа 5,8 кг, лууван 680 гр, улаан лооль 245гр, төмс 460 гр, чинжүү 320 гр, манжин 1,205 кг, сонгино 365 граммтай байжээ.
Тэмцээн уралдаанд нийлбэр дүнгээр Булган сумын “Дал” багийн ногоочид тэргүүн байр эзэлсэн бол Хадат, Завсар, усны эх багуудын тариаланчид дэд байр, зургаадугаар багийн ногоочид гутгаар байрыг тус тус эзэлжээ.
Алтан намар-ургацын баяр-2023 үйл ажиллагааны ивээн тэтгэгчээр “Баян заг Улалзах цонж төв” НҮТББайгуулага ажилласан байна.
Өмнөговь аймгийн Булган сум нь улаан лоолиороо улсдаа алдартай төдийгүй сумын иргэдийн 80 гаруй хувь нь газар тариалан эрхэлдэг.
2022 онд 25,7 га газарт тариалалт хийж 268 тонн ургацыг хураан авч байсан бөгөөд үүнээс улаан лооль 114,5 тонныг хураажээ.
