Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Социалист Вьетнам улсад хийж буй төрийн айлчлалын хүрээнд өнөөдөр (2023.11.02) “Монгол-Вьетнамын бизнес форум” арга хэмжээ БНСВУ-ын Ханой хотод зохион байгуулагдлаа.
Бизнес форумаар Монголын хүнс, хөдөө аж ахуйн салбарын мэргэшсэн холбоодын нэгдэл “Хүнсний хувьсгал” төрийн бус байгууллагын Удирдах зөвлөлийн гишүүн Т.Мөнхтөр “Монгол-Вьетнамын хүнс, хөдөө аж ахуйн салбарын хамтын ажиллагааны боломжууд” болон, “Хүнсний хангамж, аюулгүй байдал” үндэсний хөдөлгөөний хэрэгжилтийн талаар танилцууллаа.
Дотоодын хэрэгцээгээ 19 гол нэр төрлийн хүнсний бүтээгдэхүүнээр хангахаас гадна бүс нутагтаа экспортлогч улс болох тэргүүн зорилттой “Хүнсний хувьсгал” үндэсний хөдөлгөөнийг бодитоор биелүүлэхэд үндэсний үйлдвэрлэгчид, баялаг бүтээгчид чухал үүрэг гүйцэтгэнэ. Иймд хүнс, хөдөө аж ахуйн салбарын үйлдвэрлэгчдийн нэгдсэн холбоодын төлөөллүүдээс бүрдсэн “Хүнсний хувьсгал” ТББ албан ёсоор байгуулагдсан.
Бизнес форумд Вьетнам талаас хүнс, хөдөө аж ахуй, газар тариалан, эм эмнэлгийн хэрэгсэл, эрчим хүч, тээвэр ложистикийн салбарын 70 гаруй аж ахуйн нэгж, Монголын талаас 80 гаруй бизнес эрхлэгч оролцож хамтын ажиллагааны талаар саналаа солилцлоо.
