Улс орныхоо тогтвортой хөгжлийн хамгийн гол үзүүлэлт болох хүнсний хангамж, хүнсний аюулгүй байдлыг эрс сайжруулахын тулд нэн тэргүүнд төрийн бүх шатны байгууллага хоорондын ажлын уялдаа холбоо, нэгдсэн зохион байгуулалтыг сайжруулж, дор бүрнээ эрхэлсэн ажилдаа эзэн байхыг Монгол Улсын Ерөнхийлөгч У.Хүрэлсүх уриалсан билээ.
Ерөнхийлөгчийн санаачилсан “Хүнсний хангамж, аюулгүй байдлын талаар авах зарим арга хэмжээний тухай” тогтоолын төсөл 2022 оны 6 сарын 17-ны өдөр Улсын Их Хурлын чуулганы нэгдсэн хуралдаанаар хэлэлцэн батлагдснаар хүнсний сүлжээнд тулгамдаж байгаа асуудлыг хэлэлцэх, цаашид хэрэгжүүлэх арга хэмжээний чиглэл тодорхой болоод байна.
Дээрх тогтоолын “Хүнсний боловсруулах үйлдвэрлэлийн чиглэлээр авах арга хэмжээнд: Хүнсний түүхий эд, бүтээгдэхүүнийг стандартын шаардлага хангасан зориулалтын агуулах, зооринд хадгалах, бүртгэлийн нэгдсэн тогтолцоог бий болгох, хатаах, хөлдөөх, нөөшлөх бага, дунд оврын тоног төхөөрөмжийн нийлүүлэлтийг дэмжих, хүнсний сав, баглаа боодлын дотоодын үйлдвэрлэлийг хөгжүүлэх ажлыг зохион байгуулах шийдвэр гарсан.
Тогтоолын хэрэгжилтийн хүрээнд ХХААХҮЯ, Хөдөө аж ахуйг дэмжих сангийн холбогдох албаны хүмүүс өнөөдөр гурил үйлдвэрлэгчдийн төлөөлөлтэй уулзаж, дотоодын зах зээлийн гурилын хангамж, улаанбуудайн нөөц бүрдүүлэлт, үнийн зохицуулалт, буудай хадгалах сав агуулах, гурилын экспорт, хивэг үйлдвэрлэл зэрэг асуудлаар санал бодлоо солилцлоо.
Уулзалтаар “Сайн чанарын улаанбуудайгаар гурил үйлдвэрлэхийн тулд тариаланчид ч, гурилын үйлдвэрүүд нэгдсэн нэг үндэсний лавлагаа лабораторид дээжээ өгдөг, тэндээс гарч байгаа хариуг баримталдаг болъё” гэдгийг гурил үйлдвэрлэгчид илэрхийллээ. Мөн улаанбуудайгаа хадгалах сав, агуулахын хэрэгцээ шаардлага байгаа тул ХААДС-ийн агуулахыг ашиглуулахыг, Сав, агуулахын асуудлыг шийдэж чадвал гурил, тэжээлийн дотоодын хэрэгцээгээ хангаад зогсохгүй, гаднын зах зээл дээр өрсөлдөх боломж бүрдэнэ” гэдгийг үйлдвэрлэгчид хэлэв.
Манай улсын гурилын зах зээлийн багтаамж нь 210 мянган тонн. Үндэсний үйлдвэрлэгчид дотоодын хэрэгцээгээ бүрэн хангаад цаана нь гадагшаа гурилаа борлуулах бүрэн боломжтой. Ингэхийн тулд буудай хадгалах агуулах саваа бэлдэх шаардлага бий. Гурил үйлдвэрлэгчдийнхээ дээрх саналыг ХХАДС-аан хүлээн авч ХААДС-ийн агуулахыг ариутгал, цэвэрлэгээ, ашиглалтын урсгал зардлыг хариуцах байдлаар ашиглах боломжтойг үйлдвэрлэгчдэд дуулгав.
