“Хүнсний хувьсгал” цуврал сэтгүүлийн №6 дугаар хэвлэгдэн гарлаа. Энэ удаагийн дугаарт “Хүнсний хангамж, аюулгүй байдал” үндэсний хөдөлгөөний 3.5 жилийн хэрэгжилт, явц, үр дүн, үйл явдлын мэдээ мэдээллийг багтаажээ.
Монгол Улсын Ерөнхийлөгч У.Хүрэлсүхийн санаачилсан “Хүнсний хувьсгал” үндэсний хөдөлгөөний хүрээнд батлагдсан Хүнсний хангамж, аюулгүй байдлыг хангах талаар авах зарим арга хэмжээний тухай УИХ-ын 36 дугаар тогтоолын /К/ заалтад тусгагдсан ажлыг өнгөрсөн 3.5 жилийн хугацаанд “Хүнсний хувьсгал” мэргэжлийн холбооны хэвлэлийн баг хэрэгжүүлэн ажиллаж байна. Энэ хугацаанд “Хүнсний хувьсгал” цуврал нэврүүлгийн 144 дугаар, “Хүнсний хувьсгал” цуврал сэтгүүлийн зургаан дугаар, “Хүнсний хувьсгал” үндэсний хөдөлгөөнтэй холбоотой мэдээ, сурвалжилга, сошиал контентыг тогтмол бэлтгэж, хэвлэл мэдээллийн хэрэгслүүдээр түгээн ажиллажээ.
2025 оны арванхоёрдугаар сарын 12-нд буюу Дэлхийн хүнсний салбарын ажилтнуудын өдөр Засгийн газар болон үндэсний “Хүнсний хувьсгал”-д нэгдсэн ААН, үндэсний үйлдвэрлэгчид Монгол Улсын Ерөнхийлөгч У.Хүрэлсүхэд 3.5 жилийн ажлын үр дүнгээ танилцуулж, монголчууд нэгдэж нийлж ажлыг, хүнсийг дотооддоо хийж чаддаг гэдгээ харуулсан юм.
“Хүнсний хангамж, аюулгүй байдал” үндэсний хөдөлгөөний хүрээнд гарсан зарим бодит үр дүнгүүд:
Хүнс үйлдвэрлэгчид, баялаг бүтээгчдэдээ санхүүгийн бодит дэмжлэг үзүүллээ. Арилжааны банкнуудаар дамжуулан 5-6 хувийн хүүтэй, 3-5 жилийн хугацаатай, нийт 1.3 орчим их наяд төгрөгийн зээлийг 2525 орчим аж ахуйн нэгж, иргэнд олголоо. Уг нэн хөнгөлөлттэй зээл, санхүүжилтэд зориулж арилжааны 10 банкаар думжуулан төсвөөс 200 орчим тэрбум төгрөгийн зээлийн хүүгийн татаасын дэмжлэг үзүүллээ.
Эдгээр нь төр, хувийн хэвшил, иргэний гурвалсан хамтын ажиллагааны бодит үр дүн байлаа..
1000 гаруй шинэ хүнсний бүтээгдэхүүний нэр төрөл бий болж, үйлдвэрлэл бодитоор өслөө.
Хүнс, хөдөө аж ахуйн салбар өнгөрсөн жилийн мөн үетэй харьцуулахад Дотоодын нийт бүтээгдэхүүнд 5.6 хувийн өсөлт авчирсан. Энэ өсөлтийн 3.6 хувийг хүнсний боловсруулах салбарын үйлдвэрлэл эзэлж байна.
“Хүнсний хувьсгал” хөдөлгөөн, “Атрын IV аян”, Цагаан алт” хөтөлбөрийн дүнд хүнс, хөдөө аж ахуй, хөнгөн үйлдвэрийн салбарт 44 мянган ажлын байр шинээр бий боллоо.
Өнгөрсөн ондоо эх орныхоо хөгжил дэвшилд үнэтэй хувь нэмэр оруулж, хөдөлмөр зүтгэлээрээ олон хүний амьдралд гэрэл гэгээ нэмсэн баялаг бүтээгчдэдээ талархал илэрхийлье.
Та бүхэндээ шинэ оны мэнд хүргэе!
