Баянхонгор аймгийн ЗДТГ, Баянхонгор сумын ЗДТГ, ХХААГ, Стандарт хэмжилзүйн хэлтэс, “Хонгорын эрхэт зангилаа” ЖДҮ эрхлэгчдийн холбооноос хамтран зохион байгуулж буй “Цагаан сар – 2026” үзэсгэлэн худалдаа үргэлжилж байна.
Үзэсгэлэнг нээж хэлсэн үгэндээ Хүнс, хөдөө аж ахуйн газрын дарга М.Эрхэмбаяр, “Монгол Улсын Ерөнхийлөгч У.Хүрэлсүхийн санаачлан хэрэгжүүлж буй “Хүнсний хангамж аюулгүй байдал” үндэсний хөдөлгөөн, баялаг бүтээгч, үндэсний үйлдвэрлэл эрхлэгчдийн үйл ажиллагааг дэмжих, хүнсний хангамжийг нэмэгдүүлэх, борлуулалтыг дэмжих үүднээс тус үзэсгэлэнг зохион байгуулж байна. Нэмүү өртөг шингээсэн үйлдвэрлэл, техник тоног төхөөрөмж, оюуны бүтээлийг хөгжүүлж, импортыг орлосон экспорт руу чиглэсэн, Баянхонгорын онцлогтой, зах зээлд өрсөлдөх чадвартай брэнд бүтээгдэхүүнийг бий болгох нь бидний зорилго” гэдгийг онцолж байсан.
Тус үзэсгэлэн худалдаанд 20 сумын 100 гаруй иргэн, аж ахуй нэгж хөнгөн, хүнс, газар тариалан, гар урлалын бүтээгдэхүүнээр оролцож байна.
Таван үе тавгийн идээ хэмжээнээсээ хамаарч 280-400 мянган төгрөг, зүсмэл боов 1кг нь 34-37 мянган төгрөг, аарц 1кг нь 8000 төгрөг, сүү литр нь 7000 төгрөг, хонины мах гулуузаар 14 мянган төгрөг, хонины ууц 15 мянган төгрөгийн ханштай. Мөн Бууцагааны тэмээн тавхай ааруул 1кг нь 80 мянган төгрөг, говийн бор ааруул 50 мянган төгрөг, шоколадтай ааруул 32-35 мянган төгрөгөөр үзэсгэлэн худалдаанд зарагдаж байна.
“Цагаан сар – 2026” үзэсгэлэн худалдааг үргэлжлүүлэн “Хонгорын эрхэт зангилаа” ЖДҮ эрхлэгчдийн холбооноос “Экспо – 2026” үзэсгэлэн худалдааг энэ сарын 16-ны өдрийг хүртэлх хугацаанд Биеийн тамир спортын хороонд зохион байгуулна.
Эх сурвалж: https://www.montsame.mn/
