“Миний Монгол-Увс цагаан сар-2026” үзэсгэлэн худалдаа Улаангом суманд өнөөдрөөс гарч эхэллээ.
Үзэсгэлэн худалдаанд 15 сумын 200 гаруй иргэн, аж ахуйн нэгж оролцож байгаа нь урд жилүүдээс илүү өргөн цар хүрээг хамарч байна хэмээн зохион байгуулагчдын зүгээс онцоллоо. Мөн бараа бүтээгдэхүүний нэр төрөл, сав баглаа боодол, өнгө үзэмж сайжирчээ.
Харин үнийн хувьд зарим төрлийн бараа бүтээгдэхүүн өмнөх жилүүдийг бодоход нэмэгджээ. Тухайлбал, тавгийн ааруул багцаараа 350-470 мянган төгрөг болж урд жилээс 100 мянган төгрөгөөр, мөн мах болон гурилан бүтээгдэхүүний үнэ 1000-5000 төгрөгөөр нэмэгдсэн байна.
Үзэсгэлэн худалдаанд оролцогчид ноос, ноолуур, арьс, шир, сүү, сүүн бүтээгдэхүүн, мах, махан бүтээгдэхүүн, төмс, хүнсний ногоо, жимс жимсгэнэ, барилгын материал, мод, модон бүтээгдэхүүн, бэлэг дурсгал, оёмол бүтээгдэхүүн гэсэн нэр төрлөөр оролцож байна. Мөн эрүүл ахуй, халдвар хамгааллын дэглэмийг оролцогчид сайтар баримталж, иргэдэд үйлчилж байгаа бөгөөд бараа бүтээгдэхүүний борлуулалт ч сайн байна.
Үзэсгэлэн худалдаагаар эрүүл ахуйн шаардлага хангасан, өнгө үзэмж, сав баглаа боодолтой, хаяг шошго, борлуулалт сайтай, хэрэглэгчдийн эрэлтэд нийцсэн шилдэг таван бүтээгдэхүүнийг шалгаруулан шагнаж урамшуулах юм.
Эх сурвалж: https://www.montsame.mn/
