Дорнод аймгийн Хэрлэн сумын 5 дугаар багийн өрхийн тариаланчдын нэг төлөөлөл Б.Дэлгэрцогт юм. Тэрээр 13 жилийн өмнө “Чацаргана” төслөөс анх тарьц, суулгац авснаар жимсний мод тарьж эхэлжээ. Харин өнөөдөр нэг га талбайд 500 чацарганы мод, 200 гаруй алимын мод тарьж, намартаа дөрвөн тонн чацаргана хурааж байна. Нэг хүн өдөрт гараар 30 кг-ыг түүдэг бөгөөд жимсээ хураах үед хүн хүч дутдаг талаараа ярьж байлаа.

Саяхныг хүртэл Б.Дэлгэрцогт “Шар доктор”-т чацаргана жимсээ нэг кг-ыг нь 4500 төгрөгөөр нийлүүлдэг байсан бол гурван жилийн өмнөөс “Авто агро” ХХК-тай хамтран өтгөрүүлсэн шүүс болгон савлаж, цөөн тоогоор зах зээлд нийлүүлж эхэлжээ.

Ийнхүү өрхийн тариалан эрхлэгчид ямар нэгэн төрлийн тендерт орж чадахгүй учраас ургацынхаа дийлэнхийг цэцэрлэг, сургууль болон хүнс нийлүүлдэг компаниудад хямд үнээр борлуулдаг байна.

Чацаргана жимс нь багахан хэмжээний уураг агуулдаг ч артерын судасны ханыг гэмтэхээс хамгаалдаг. Мөн ханиадыг намдаах, цус шингэлэх, зүрх-судасны системийн эргэлтийг сайжруулахад тустай.

Чацарганад хүний биед зайлшгүй шаардлагатай уураг, органик хүчил, витамин, кальци, фосфор, магни, натри зэрэг олон элемент агуулагддаг. Түүнчлэн ходоодыг эрүүлжүүлж, гэдэс цэвэрлэх, цус төлжүүлэх, өтгөн шингэнийг зохицуулах, дэлүүг эрүүлжүүлэх зэрэг ач тустай юм.