Нярайн эрүүл мэндэд аюултай хорт бодис агуулагдаж болзошгүй байгаа тул Европын хэд хэдэн улсад худалдаалагдаж байсан нярай хүүхдийн зарим төрлийн сүүн тэжээлийг зах зээлээс татан авч байгаагаа олон улсын Nestle корпорац мэдэгдсэн тухай BBC телевиз мэдээлжээ.
Компанийн мэдээлснээр, нярай хүүхдийн сүүн тэжээлийн зарим бүтээгдэхүүнд церулид хэмээх нянгийн гаралтай хорт бодис агуулагдаж байж магадгүй аж. Энэ бодис нь хордлого болох үйл явцыг түргэтгэж, бөөлжих, ходоод базлах зэрэг зовуурь үүсгэдэг байна.
Эрүүл мэндэд эрсдэл учруулж болзошгүй дээрх бүтээгдэхүүнүүдийг Франц, Герман, Австри, Дани, Итали, Швед зэрэг Европын хэд хэдэн улсад худалдаалж байжээ.
Уг бүтээгдэхүүнтэй холбоотойгоор өвчлөл бүртгэгдсэн тохиолдол одоогоор байхгүй байгаа боловч урьдчилан сэргийлэх үүднээс зах зээлээс татан авч байна гэж Nestle компани мэдэгдсэн байна. Мэдэгдэлд мөн Nestle-ийн бусад бүх бүтээгдэхүүн, түүнчлэн татан авалтад хамрагдаагүй ижил төрлийн бүтээгдэхүүнүүд хэрэглэхэд аюулгүй гэдгийг онцолсон байна.
Эх сурвалж: https://montsame.mn/mn/