Монгол Улсын Ерөнхийлөгч У.Хүрэлсүх “Хүнсний хувьсгал” үндэсний хөдөлгөөний хэрэгжилт, үр дүнтэй танилцаж, “Сүүн зайрмаг” ХХК-ийн үйлдвэрт ажиллалаа.
Мөн Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн, Эдийн засаг, хөгжлийн яамны Төрийн нарийн бичгийн дарга И.Батхүү, Сангийн яамны Төрийн нарийн бичгийн дарга Б.Анар, Нийслэлийн Засаг Даргын 1-р орлогч Б.Мөнхбат, Стандарт хэмжил зүйн газрын дарга Х.Батжаргал болон салбарын төлөөллүүд ажиллалаа.
“Сүүн зайрмаг” ХХК нь 2018 оноос эхлэн хүнсний хангамжийн тогтвортой байдлыг дэмжих, иргэдийн эрүүл хэрэглээг төлөвшүүлж буй үндэсний үйлдвэрлэгч, баялаг бүтээгч юм.
“Итгэлийг эрхэмлэнэ, чанарыг амлана” уриатай тус компани бүх насныханд зориулсан бүтээгдэхүүн үйлдвэрлэж, зайрмагийг газар дээр нь боловсруулан хэрэглэгчийн гарт шууд хүргэдэг шинэлэг тогтолцоог нэвтрүүлснээр Монголын зайрмагны зах зээлд шинэ хандлага авчирсан юм.
Ингэхдээ уламжлалт цагаан идээ буюу өрөм, сүүн зайрмаг, тарагны зайрмаг зэргийг нэмэлт амт, өнгө оруулагчгүйгээр үйлдвэрлэн улсын хэмжээнд нийт 130 гаруй борлуулалтын цэгээр дамжуулан хэрэглэгчдэдээ хүрч байна. Нийслэлээс 100 км доторх үхрийн фермүүдтэй хамтарч кластерын системээр ажилладаг юм.
80 орчим ажилтантай бөгөөд 2025 онд 2.5 тэрбумын хөрөнгө оруулалтаар шинэ үйлдвэртэй болж, цаашид тоног төхөөрөмжийн бүрэн автомат урсгалыг нэвтрүүлэхээр ажиллаж байна.
Монгол Улсын хэмжээнд 18 аймгийн 26 суманд хоногт 1000 гаруй тонн сүү хүлээн авч боловсруулах хүчин чадал бүхий 90 гаруй үйлдвэр, цех, 86 сүү хүлээн авах хөргөлттэй төв үйл ажиллагаа явуулж байна. Дээрх үйлдвэр цехүүд нь суурилагдсан хүчин чадлын 50 гаруй хувийг ашиглан үйлдвэрлэл явуулж, 2050 гаруй хүнийг ажлын байраар хангаж байна.
