“Эхийн хоол тэжээлийн тусламж үйлчилгээ” сэдэвт орон нутгийн сургагч багш бэлтгэх сургалтыг 6 дугаар сарын 29-нөөс 7 дугаар сарын 2-ны өдрүүдэд Баянхонгор суманд зохион байгууллаа.

Сургалтад аймгийн Нэгдсэн эмнэлэг, сум, өрхийн эрүүл мэндийн төвүүдийн эх баригчид хамрагдаж, эхийн хоол тэжээлийн зөвлөгөө, сургалт зохион байгуулах, мэдээлэл түгээх арга зүй, ур чадварыг эзэмшлээ. Ингэснээр тэд орон нутагтаа жирэмсэн эмэгтэйчүүд, хөхүүл эхчүүдэд чиглэсэн хоол тэжээлийн боловсрол, зөвлөгөө, тусламж үйлчилгээг чанартай хүргэх боломж бүрдэх юм.

Тус сургалтыг Баянхонгор аймгийн ЗДТГ, Эрүүл мэндийн газар, Үндэсний нийгмийн эрүүл мэндийн төв хамтран, НҮБ-ын Хүүхдийн сангийн санхүүжилт, дэмжлэгтэйгээр зохион байгуулжээ.

Хүний амьдралын хамгийн чухал үе болох ургийн хөгжлөөс эхлээд хүүхэд хоёр нас хүртэлх хугацааг “Алтан 1000 хоног” хэмээн нэрлэдэг. Энэ хугацаанд хүүхдийн эрүүл мэнд, бие бялдар, оюун ухааны хөгжлийн суурь тавигдаж, хэтийн төлөв тодорхойлогддогоос гадна тархи болон бие махбод хамгийн эрчимтэй хөгждөг байна. Иймээс жирэмсэн болон хөхүүл эхийн хооллолт, хоол тэжээлийн байдал нь хүүхдийн эрүүл мэнд, өсөлт хөгжилд шууд нөлөөлдөг.

Мөн бага насны хүүхдийн бие бялдар, оюуны хөгжлийг дэмжихэд эрүүл, зөв хооллолт шийдвэрлэх ач холбогдолтойг мэргэжилтнүүд онцолж байна.

“Алтан 1000 хоног”-ийн хугацаанд эх, хүүхэд шаардлагатай шим тэжээл, илчлэг бүхий хоол хүнсээр бүрэн хангагдвал хүүхдийн бие бялдар, тархи, танин мэдэхүйн хөгжил хэвийн бүрэлдэж, хөдөлгөөний ур чадвар, нийгэмд дасан зохицох чадварын суурь тавигддаг байна.

Эх сурвалж: Монцамэ агентлаг