Төв аймаг энэ онд нийт 151 мянган га талбайд тариалалт хийхээр төлөвлөснөөс өнөөдрийн байдлаар 145 мянган га талбайд тариалалт хийж, ажлын явц 95 хувьтай үргэлжилж байна. Урьдчилсан тооцоогоор энэ намар 450 мянга орчим тонн ургац хураан авахаар төлөвлөж байгаа талаар аймгийн Хүнс, хөдөө аж ахуйн газрын дарга Л.Даваасүрэн мэдээллээ.

Тэрбээр, улаанбуудайг 48 мянган га талбайд тариалахаар төлөвлөсөн ч тариаланчид нийт 58.7 мянган га талбайд тариалснаар төлөвлөгөө 123.7 хувиар даван биелсэн байна. Мөн төмс, хүнсний ногоо, жимс, жимсгэнэ, малын тэжээл болон тосны ургамлын тариалалт бүрэн дууссан.

Аймгийн хэмжээнд тариалангийн ургамлын ургалт, хөгжлийг тогтмол хянаж байгаа бөгөөд цаг агаарын нөхцөл, ургамлын төлөв байдалд үндэслэн наймдугаар сарын 20-ны орчимд энэ жилийн ургацын бодит хэмжээ тодорхой болох юм.

Үрийн шинэчлэлийн хүрээнд төмсний үрийн чанарыг сайжруулах ажилд онцгой анхаарч, Жаргалант суманд 120 тонн шинэчилсэн үрийн төмсөөр үрсэлгээ хийсэн байна. Харин улаанбуудай, хүнсний ногоо, жимс, жимсгэнийн үйлдвэрлэлд Япон, Орос, Германы өндөр ургацтай, нутагшуулах боломжтой сортуудыг үе шаттайгаар нэвтрүүлж байгаа.

Төв аймаг нь газар тариалангийн үйлдвэрлэлээр улсын тэргүүлэх бүсүүдийн нэг бөгөөд үрийн шинэчлэл, дэвшилтэт технологи, техник тоног төхөөрөмжийн шинэчлэлд тогтмол хөрөнгө оруулснаар ургацын хэмжээ, чанарыг нэмэгдүүлэх зорилт тавин ажиллаж байна гэв.

Эх сурвалж: Монцамэ агентлаг