Монос Хүнс ХК Зүүн бүсийн логистикийн сүлжээгээ өргөжүүлж, 2730 метр квадрат талбай бүхий MFC East Log шинэ агуулахыг бүрэн ашиглалтад орууллаа.
Ингэснээр тус бүсийн харилцагч, хэрэглэгчдэд хүнсний бүтээгдэхүүнийг илүү шуурхай, хүртээмжтэй хүргэх боломж бүрдэж байна.
Хүнсний аюулгүй байдлын шаардлагад нийцүүлэн барьсан тус агуулах нь хуурай болон шингэн хүнсний бүтээгдэхүүн хадгалах зориулалттай бөгөөд Зүүн бүсийн хадгалалт, түгээлтийн хүчин чадлыг нэмэгдүүлэх ач холбогдолтой юм.
Шинэ агуулахын нээлтийн арга хэмжээнд Монос Хүнс ХК-ийн ТУЗ-ийн гишүүд, менежментийн баг, Монос группийн захирлууд болон бүтээн байгуулалтад оролцсон байгууллагуудын төлөөлөл оролцлоо. Арга хэмжээг Монос Хүнс ХК-ийн ТУЗ-ийн дарга Х.Ананд нээж, Гүйцэтгэх захирал А.Отгондарь MFC East Log агуулахын бүтээн байгуулалтын үр дүн, ач холбогдлыг танилцуулсан байна.
Тус агуулах ашиглалтад орсноор Улаанбаатар хотын төв замын ачааллыг бууруулж, тээвэрлэлтийн зай болон шатахууны хэрэглээг багасгахын зэрэгцээ хүлэмжийн хийн ялгарлыг бууруулахад тодорхой хувь нэмэр оруулах юм. Мөн 10 кВт хүртэлх цахилгааны хэрэгцээг нарны эрчим хүчээр хангах нарны панель суурилуулсан бөгөөд дулааны алдагдлыг бууруулах ухаалаг зохион байгуулалтаар эрчим хүчний хэмнэлтийг бий болгожээ.
MFC East Log агуулахын бүтээн байгуулалт нь Монос Хүнс ХК-ийн эрүүл мэндийг дэмжсэн хүнсний бүтээгдэхүүнийг хэрэглэгчдэд илүү ойр, шуурхай, тогтвортой хүргэх урт хугацааны хөгжлийн төлөвлөгөөний нэг хэсэг болж байна.
