Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Монгол Улсын Ерөнхийлөгчийн орон тооны бус зөвлөх Ц.Ганзориг, “Хүнсний хувьсгал” ТББ-ын Гүйцэтгэх захирал Б.Батцэцэг, “Баялаг бүтээгчдийг дэмжих холбоо”-ны Гүйцэтгэх захирал Т.Өлзийсайхан, Налайх хотын хөгжлийн корпораци ОНӨААТҮГ-ын дарга Д.Цэнд, Налуу-Ухаа эдийн засгийн тусгай бүсийн Захирагчийн ажлын албаны дарга Т.Батсүх, тус ажлын албаны Хот төлөвлөлтийн зөвлөх С.Намжилмаа нар Налайхын Үйлдвэрлэл, технологийн парк ХК-д ажиллаж, паркийн үйл ажиллагаа, бүтээн байгуулалтын явцтай танилцлаа.
Уулзалтаар Налайх дүүргийг үйлдвэрлэл, инноваци, бизнесийн хөгжлийн стратегийн төв болгон хөгжүүлэх, Үйлдвэрлэл, технологийн парк болон Налуу-Ухаа эдийн засгийн тусгай бүсийн хөгжлийн уялдаа холбоог бэхжүүлэх, хувийн хэвшлийн хөрөнгө оруулалтыг нэмэгдүүлэх, экспортын чиг баримжаатай үйлдвэрлэлийг дэмжих асуудлаар санал солилцож, хамтын ажиллагааны чиглэлүүдийг өргөн хүрээнд хэлэлцэв.
Тус парк нь Улаанбаатар хотоос 43 км, Налайх дүүргээс 8 км зайд, авто болон төмөр замын дэд бүтцэд ойр байршилтай. Үйлдвэрлэлийн бүсэд “Эрдэнэт” ҮТП, “Эмээлт эко” ҮТП, “Багахангай” ҮТП, “Багануур” ҮТП зэрэг үйлдвэрлэл, технологийн паркуудтай холбогдох боломжтой бөгөөд стратегийн ач холбогдол бүхий байрлалд оршиж байна.
Мөн улсын болон нийслэлийн төсвөөс нийт 29.9 тэрбум төгрөгийн хөрөнгө оруулалт хийгдэж, оффисын барилга, авто зам, үерийн далан, гүний худаг, цахилгаан хангамж зэрэг дэд бүтцийн бүтээн байгуулалтууд хийгдсэн байна. Тухайлбал, 660 м.кв талбай бүхий оффисын барилга, 4.64 км авто зам, 2 сувгийн нийт 2400 м урт үерийн хамгаалалтын байгууламж, гүний худаг болон 110/10 кВ-ын дэд станц зэрэг бүтээн байгуулалт багтжээ.
Стандарттай үйлдвэрлэл – ногоон хөгжил уриан дор байгальд ээлтэй, инновацад суурилсан үйлдвэрлэлийг хөгжүүлэх зорилт тавин ажиллаж буйгаа танилцууллаа.
Энэхүү уулзалт нь Налайхын Үйлдвэрлэл, технологийн парк, Налуу-Ухаа эдийн засгийн тусгай бүс болон төр, хувийн хэвшлийн байгууллагуудын хамтын ажиллагааг шинэ шатанд гаргаж, үндэсний үйлдвэрлэл, бүс нутгийн эдийн засгийн хөгжлийг дэмжих бодит боломжийг бүрдүүлэх чухал ач холбогдолтой уулзалт боллоо.
