Хөвсгөл аймгийн үйлдвэрлэгчдийн бүтээгдэхүүнийг сурталчлах, нэр төрлийг нэмэгдүүлэх, иргэдэд орон нутагт үйлдвэрлэсэн чанартай бүтээгдэхүүнийг боломжийн үнээр хүргэх, цаашид дотоод, гадаадын зах зээлд гарах боломжийг нэмэгдүүлэх зорилготой “Бүтээлч Хөвсгөлийнхөн” намрын ногоон өдрүүд үзэсгэлэн худалдаа хоёр дахь өдрөө үргэлжилж байна.
Тус үзэсгэлэн худалдааг 21 дэх жилдээ зохион байгуулж байгаа бөгөөд энэ жилийн худалдаанд сүү, цагаан идээний бүтээгдэхүүн эрэлт ихтэй, борлуулалт сайн байгааг оролцогчид хэлж байна. Тухайлбал, шар тос кг нь 45 мянга, сүү, тараг нэг литр нь 4000, ааруул 25-35 мянган төгрөгийн үнэтэй байна.
Энэ жил Хөвсгөл аймгийн 23 сумын 403 иргэн, 34 аж ахуйн нэгж, хоршоо, 78 өрхийн үйлдвэрлэгч оролцож, бүтээгдэхүүнээ борлуулж байна.
Энэ жилийн үзэсгэлэнд сүү, цагаан идээ, бяслаг зэрэг нэмүү өртөг шингээсэн орон нутгийн бүтээгдэхүүнээс гадна жижиг, дунд үйлдвэрлэлийн тоног төхөөрөмжийн дэмжлэг авсан үйлдвэрлэгчид оролцож байгаагаараа онцлог юм.
Үзэсгэлэн худалдаанд орон нутгийн үйлдвэрлэгчид шинэ ургацын төмс, хүнсний ногоо, жимс, жимсгэнэ, цагаан идээ, мах, махан бүтээгдэхүүн, оёмол эдлэл болон нутгийн түүхий эдээр үйлдвэрлэсэн төрөл бүрийн бүтээгдэхүүнээр оролцож байна.
Эх сурвалж: Монцамэ агентлаг
