Нийслэлийнхнийг шинэ ургацын ногоо, дотоодын бүтээгдэхүүнээр хангах зорилготой “Намрын ногоон өдрүүд-Үндэсний үйлдвэрлэл 2026” нэгдсэн үзэсгэлэн худалдааны албан ёсны нээлт Төв цэнгэлдэх хүрээлэнд болов.
Нээлтэд Ерөнхий сайд Н.Учрал, Хүнс, хөдөө аж ахуй, хөнгөн үйлдвэрийн сайд Ц.Идэрбат, нийслэлийн Засаг дарга бөгөөд Улаанбаатар хотын захирагч Б.Пүрэвдагва, Монгол Улсад суугаа Элчин сайдын яамд болон дипломат байгууллагын удирдлагууд, НҮБ-ын Хүнс, хөдөө аж ахуйн байгууллага болон олон улсын хөгжлийн түнш байгууллагын төлөөлөгчид, үндэсний үйлдвэрлэгчид, тариаланчид, малчид, хоршоодын төлөөлөл оролцсон байна.
ХХААХҮ-ийн сайд Ц.Идэрбат “Энэ жилийн ургацын урьдчилсан балансаар 555.3 мянган тонн үр тариа хураахаар байна. Үүний дотор 497.1 мянган тонн улаан буудай, мөн 168.2 мянган тонн төмс, 218.4 мянган тонн хүнсний ногоо хураан авахаар төлөвлөж байгаа юм. Улаан буудай, төмсний дотоодын хэрэгцээг бүрэн хангаж, хүнсний ногооны хангамжийг нэмэгдүүлэх боломж бүрдэж буй нь тариаланчдын хөдөлмөр, төрийн бодлого, үйлдвэрлэлийн дэмжлэгийн бодит үр дүн юм гээд дотоодын үйлдвэрлэлээрээ улсаа 100 хувь хангахыг уриалъя” гэв.
Засгийн газар энэ жил 100 мянган тонн улаан буудайн нөөц бүрдүүлнэ. Мөн 12 мянган тонн төмс, хүнсний ногооны нөөцийг анх удаа бүрдүүлэхээр шийдвэрлэжээ. Төрийн банкаар дамжуулан олгох 1.1 их наяд төгрөгийн нэн хөнгөлөлттэй зээлийн тодорхой хувийг хөдөө аж ахуйн салбарт зарцуулах юм байна.
Энэ жилийн “Намрын ногоон өдрүүд-Үндэсний үйлдвэрлэл” үзэсгэлэн худалдаанд нийслэл болон 21 аймгийн 530 гаруй аж ахуйн нэгж, 3000 орчим нэр төрлийн бүтээгдэхүүнээр оролцож байна. Өөрөөр хэлбэл, хүнсний болон хөнгөн үйлдвэр, жижиг дунд үйлдвэрлэл эрхлэгч, орон нутгийнхан, органик бүтээгдэхүүн, тариаланчид, нийслэлийн ногоочид 200 гаруй асарт эх орондоо үйлдвэрлэсэн, тарьж ургуулсан бүтээгдэхүүнийг хүргэж байна. Түүнчлэн импортын бүтээгдэхүүнийг өргөтгөсөн худалдааны үеэр хязгаарлав.
Эх сурвалж: Монцамэ агентлаг
