Түншүүд ба донор байгууллагууд: ХХААХҮЯ; Мал Эмнэлгийн Ерөнхий Газар; Дэлхийн Банк

Хэрэгжих хугацаа: 2020-2023

Төслийн зорилго: Мал эмнэлгийн үйлчилгээний чанар, хүртээмжийг сайжруулах, зорилтот газруудыг хил дамнасан гоц халдварт өвчнөөс эрүүл бүс болгох ажилд хувь нэмэр оруулах

Байршил: 12 аймгийн 80 сум, Улаанбаатар хот

Мал аж ахуй нь Монгол улсын хүн амын хүнсний гол нэрийн бүтээгдэхүүнийг үйлдвэрлэгч салбар бөгөөд боловсруулах үйлдвэрлэл болон экспортын орлогын үндсэн түүхий эдийг бүрдүүлдэг тул Монгол улсын эдийн засагт чухал үүрэг гүйцэтгэдэг. Мал аж ахуй нь дахин сэргээгдэх нөөц төдийгүй Монголчуудын хувьд уламжлалт амьдралын хэв маяг юм.

Уг төслийн зорилго нь НҮБ-ийн ХХААБ-ын Монгол улсад хэрэгжүүлэх үйл ажиллагааны тэргүүлэх чиглэлийн нэгдүгээр хэсэг буюу “мал сүргийн эрүүл мэнд, ашиг шим, бэлчээр, тэжээл, усны хангамжийг сайжруулах замаар тогтвортой мал аж ахуйг хөгжүүлэх” зорилттой уялдаж байгаа юм.

Төслийн үндэслэл

Монгол улс мал аж ахуйн бүтээгдэхүүний үйлдвэрлэлийг тогтвортой хөгжүүлэхэд томоохон хүндрэлүүд тулгарч байна. Тухайлбал, мал эмнэлгийн үйлчилгээ дутмаг, хил дамнасан гоц халдварт өвчний тохиолдлууд удаа дараа гарсаар байгаа явдал юм. Одоогийн мал эмнэлгийн үйлчилгээ нь хүн хүч, боловсон хүчний чадавх, санхүүгийн хувьд дутагдалтай байгаа нь халдварт өвчний хяналт, малын эрүүл мэндийн нэгдсэн хөтөлбөрийг хэрэгжүүлэхэд хүндрэл учруулж байна.

Үйл ажиллагаа

Энэ төсөл нь мал эмнэлгийн үйлчилгээний чадавхыг сайжруулж улмаар халдварт өвчний тоог бууруулж, мал амьтны болон хүн амын эрүүл мэндийг сайжруулахад хувь нэмрээ оруулах юм. Түүнчлэн, төрийн болон хувийн мал эмнэлгийн үйлчилгээний чанарыг олон улсын стандарттай нийцүүлэхэд дэмжлэг үзүүлэн ажиллана. Мал эмнэлгийн менежментийг сайжруулах замаар нэмүү өртгийн сүлжээнд илүү чанартай аюулгүй мал, малын гаралтай бүтээгдэхүүн нийлүүлэх боломжийг бүрдүүлнэ.

• “Нэг эрүүл мэнд” уриалгын хүрээнд малаас хүнд халдварлах өвчний хяналт, бичил биетний тэсвэржилтээс урьдчилан сэргийлэх, хүнсний аюулгүй байдлыг сайжруулах чиглэлээр малын эмч нарт зориулсан сургалтын хөтөлбөрийг боловсруулах, хэрэгжүүлэх.

• Эрсдэлд суурилсан өвчний тандалт болон хяналтын тогтолцоог сайжруулах, бэлэн байдлын үнэлгээ болон мониторинг хөгжүүлж хэрэгжүүлэх замаар хил дамнасан өвчний хяналтыг сайжруулах, улмаар шүлхий болон бог малын мялзан өвчнөөс эрүүл бүс нутаг болоход дэмжлэг үзүүлэх.

• Мал эмнэлгийн оношилгооны лабораторийн нэгдсэн сүлжээг бий болгох, 10 мал эмнэлгийн лабораторийн тоног төхөөрөмжийг сайжруулах, чанарын баталгаажуулалтын хөтөлбөрийг боловсруулах.

• Мал эмнэлгийн нэгдсэн системийн ажиллагааг өргөжүүлэх, энэ хүрээнд хүний нөөцийн чадавхыг бэхжүүлэх, эрсдэлд суурилсан өвчний тандалт болон хяналтын тогтолцоог сайжруулах, лабораторийн мэдээллийн менежментийн системтэй уялдуулах.

• Мал эмнэлгийн үйлчилгээний чанарыг сайжруулахад хувийн мал эмнэлгийн нэгжүүдийг дэмжих.