Хүнсний тогтолцооны асуудлаарх дээд хэмжээний уулзалт даваа гарагт Ром хот дахь НҮБ-ын Хүнс, хөдөө аж ахуйн байгууллагын (ХХААБ) төв байранд эхэлнэ.
Чуулганы нээлтэд НҮБ-ын Ерөнхий нарийн бичгийн дарга Антониу Гутерриш, Италийн Ерөнхий сайд Жоржа Мелони, ХХААБ-ын тэргүүн Цюй Дунюй нар үг хэлнэ.
Гурван өдөр үргэлжлэх уулзалтад 160 орны 2000 орчим төлөөлөгч, тэр дундаа 20 гаруй орны төр, засгийн тэргүүн нар, олон улсын томоохон байгууллагуудын төлөөлөл, мөн сайд нарын түвшин 70 орчим төлөөлөгч оролцох төлөвтэй байна.
Чуулганд оролцогчид 2021 оны есдүгээр сард Нью-Йорк хотноо болсон анхдугаар чуулга уулзалтын үеэр улс орнуудын хүлээсэн амлалтуудад гарсан ахиц дэвшлийг дүгнэж, саад бэрхшээлийг даван туулах, тулгамдаж буй асуудлуудыг хэлэлцэхийн зэрэгцээ тэргүүлэх чиглэлүүдээ тодорхойлно гэж зохион байгуулагчид мэдээлсэн байна. Түүнчлэн коронавирусний цар тахлын үр дагавар, байгалийн гамшиг, зэвсэгт мөргөлдөөний улмаас дэлхий даяар 783 сая орчим буюу 2019 оныхоос 122 саяар их хүн өлсгөлөнд нэрвэгдэж байгаа энэ үед дээд хэмжээний уулзалт болж байгааг онцлон тэмдэглэжээ.