Пробиотик ба Пребиотик гэж юу вэ ?
Пробиотик гэдэг нь хүний биен дэх ашигтай бактери бөгөөд тэдгээр нь дархлаа дэмжих, ходоод гэдэсний хэвийн бичил орчныг тэнцвэржүүлэн сайжруулах зэрэг хүний эрүүл мэндэд маш олон талын ашиг тустай хүний биед байгалиас агуулагддаг нян юм.
Харин пребиотик нь бактерийн өсөлтөд тусалдаг пробиотикийн хамтрагч бөгөөд таны идэж буй хүнсний эслэгүүдийн нэгдэл юм. Эдгээр микробууд нь хүний биед хэрэгтэй тодорхой нэгдлүүдийг гарган авч, эрүүл байхад тусалдаг. Гадил, сонгино, сармис, спаржа, артишок, улаан лооль, чавга, алим, самар, шар буурцаг, бүхэл үрийн хүнсэнд пребиотик элбэг байдаг.
Эрдэмтэд пребиотик нь “гэдэсний ашигтай бактерийн өсөлтийг өдөөж, гэдэсний эрүүл бичил биетийг хадгалахад тусалдаг талаарх судалгааг үргэлжлүүлэн хийсээр байна. Илүү их эслэг идэхийн зэрэгцээ бичил биетний эрүүл мэндийг дэмжих арга замаар хооллох нь бидний бодож байгаагаас илүү хүний биед ашиг тустай гэдэг нь судалгаагаар нотлогдоод байна.
Судалгааг явуулахын тулд судлаачид өмнө нь нийтлэгдсэн шинжлэх ухааны дүгнэлтийг ашиглан хоолны дэглэм судлалын Хүнс, шим тэжээлийн мэдээллийн санд агуулагдах 8690 хүнсний пребиотикийн агууламжийг шинжлэн үзэхэд мэдээллийн санд бүртгэгдсэн хүнсний бүтээгдэхүүний 37 орчим хувь нь пребиотик агуулдаг бол эрдэмтдийн судалгааны үр дүнд данделион навч, артишок, сармис, таана, сонгино зэрэг хүнсний ногоо нь хамгийн их хэмжээний пребиотик агуулдаг нь тогтоогджээ. Тус ногоонууд нь нэг грамм тутамд 100-240 миллиграмм пребиотик агуулагддаг бол сонгины цагираг, цөцгийтэй сонгино, үхрийн вандуй, спаржа, үр тарианд 50-60 мг агуулагддаг байна.
Олон улсын пробиотик ба пребиотикийн шинжлэх ухааны нийгэмлэг өдөрт дор хаяж таван грамм пребиотик хэрэглэхийг хүмүүст зөвлөөд байна. Жижиг сонгины хагасыг нь хоолондоо хэрэглэх нь таван граммын пребиотиктой тэнцэнэ. Харин улаан буудай агуулсан бүтээгдэхүүнд пребиотик маш бага агуулагддаг бол сүү сүүн бүтээгдэхүүн, өндөг, мах махан бүтээгдэхүүнд пребиотик огт агуулагдаагүй ажээ.
Эрдэмтэд олон төрлийн орц найрлагатай бүтээгдэхүүний хоол хүнсэндээ хэрэглэх, пребиотикийн эрүүл мэндэд үзүүлэх шим тэжээл ашиг тусын нөлөөг илүү нарийвчлан тодорхойлоход цаашид илүү их судалгаа хийх шаардлагатай гэж тайлбарлажээ.