АНУ, Монгол Улсын стратегийн түншлэлийг бэхжүүлэх зорилгоор АНУ-ын Дэд Ерөнхийлөгч Камала Харрис, Монгол Улсын Ерөнхий сайд Лувсаннамсрайн Оюун-Эрдэнэ нар Вашингтон хотноо наймдугаар сарын 2-нд уулзлаа. Энэхүү айлчлалын хүрээнд АНУ-ын Олон улсын хөгжлийн агентлагийн (USAID) Монгол дахь үйл ажиллагааг өргөжүүлэх зорилгоор АНУ-аас шинээр санхүүжилт олгох болсноо зарлажээ.
АНУ, Монгол Улс ойрын таван жилийн хугацаанд хэрэгжих 25 сая ам.долларын өртөгтэй хоёр талын тусламжийн шинэ хэлэлцээрт гарын үсэг зурснаа зарлав. USAID агентлаг болон Конгресс нь Монгол Улсын Засгийн газартай хамтран ажиллах энэхүү гэрээний эхний үе шатанд дараах зорилгоор 12 сая долларын хөрөнгө оруулалт хийхээр төлөвлөж байна. Үүнд:
- Ногоон эрчим хүчний хүртээмжийг нэмэгдүүлж, эдийн засгийг төрөлжүүлж, ардчилсан институцийг бэхжүүлэх;
- Бизнесийн орчныг сайжруулах, өрсөлдөх чадварыг нэмэгдүүлэх, жижиг, дунд үйлдвэрлэлийн эдийн засгийн боломжийг нэмэгдүүлэх чиглэлээр хувийн хэвшлийн байгууллагуудтай хамтран ажиллах;
- Хоёр талын шинэчилсэн “Эдийн засгийн хамтын ажиллагааны замын зураглал”-д тусгагдсан USAID-ын хөтөлбөрүүдийг өргөжүүлэх асуудлууд багтана.
Түүнчлэн байгалийн гамшигт үзэгдэл болох зуны ган гачиг, өвлийн зудад тэсвэртэй байх чадварыг дэмжих зорилгоор USAID агентлагаас хэрэгжүүлж буй гамшгаас хамгаалах хөтөлбөрүүдэд зориулж 600 мянган ам.долларын хүмүүнлэгийн тусламж үзүүлж байгааг зарлалаа. Зудын улмаас олон тооны мал үхэж амьжиргаа нь малаас хамааралтай малчдад хүндээр нөлөөлдөг. Өнгөрсөн өвлийн зуданд Монголын нутаг дэвсгэрийн 60 хувь, 200 орчим мянган малчин өрх өртсөн юм.
1990-ээд оны эхэн үеэс хойш ардчилалд шилжих эхний жилүүдэд USAID агентлаг Монголын ард түмэнтэй хамтдаа байж, өнөөг хүртэл 377 сая гаруй долларын дэмжлэг үзүүлжээ. Бид амар амгалан, хөгжин цэцэглэж буй, аюулгүй Монгол орны төлөөх хамтын ажиллагаагаа цаашид ч үргэлжлүүлэх болногэж тус агентлагийн хэвлэлийн мэдээнд дурджээ.