Сингапур улсын эрх баригчид микробыг агаар, нарны гэрлийн тусламжтай үржүүлэх замаар гаргаж авсан уургийг хүнсэнд хэрэглэх зөвшөөрөл олгосон нь дэлхийд анхны тохиолдол болжээ.
“Агаараас гаргаж авсан хүнс” буюу Solein гэж өөрийн бүтээгдэхүүнийг нэрлэдэг Финландын стартап компани Solar Foods зөвшөөрлийг авсан байна. 2024 оноос эхлэн Solein агуулсан хоол хүнснүүд Сингапурын зах зээлд нийлүүлэгдэх юм.
Турмериктэй адилхан харагдах алтлаг шаргал өнгийн энэ уураг нь дэлхийн хүнсний асуудлыг шийдэх ирээдүйтэй гэгдэж байгаа.
Уг уураг нь чихэрлэг, шорвог, гашуун, исгэлэнгээс гадна үндсэн таван амтын нэг гэгддэг “умами” амттай юм байна. Мах, бяслаг, мөөг зэрэг хүнснүүд ийм амттайд тооцогддог. Уургийг үйлдвэрлэх үйл явц дарс, шар айраг зэрэг шингэн хүнсийг үйлдвэрлэхтэй ерөнхийдөө төстэй юм байна. Өөрөөр хэлбэл хүний биед ашигтай микробуудыг агаараас гаргаж авсан элементүүдтэй нийлүүлэн исгэх ба ингэхдээ нарны гэрлээр үйлдвэрлэсэн цахилгаан эрчим хүч ашигладаг гэнэ. Ашиглах усаа хүртэл агаараас гаргаж авдаг юм байна.
Тиймээс амьтан, ургамлын гаралтай ямар ч орц найрлагагүй бүтээгдэхүүнээ Solar Foods байгальд хамгийн ээлтэй хүнс гэж үздэг гэнэ. Solar Foods компанийн анхны үйлдвэр Финландын Вантаа хотод байгуулагдаж, үйлдвэрлэлээ ирэх онд эхлүүлэхээр төлөвлөсөн байна. Тус компани Сингапурыг бүтээгдэхүүнээ туршихад хамгийн тохиромжтой улс гэж сонгожээ. Дараа нь АНУ, Их Британи, Европын Холбооны зах зээлд гаргахаар төлөвлөсөн байна.
2020 оны нэг судалгаанд Сингапурын хүн амын 7 хувь нь өөрийгөө ногоон хүнстэн (веган) гэж тодорхойлжээ. Үүнээс гадна тус улсын хүн амын дунд “flexitarian” буюу ногоогоор голлож, хааяа мах хэрэглэдэг холимог хоолны дэглэмтэй хүмүүс улам бүр олширч байгаа нь судалгаанаас харагдсан байна.
Solar Foods компанийн технологийг Time сэтгүүл 2020 оны дэлхийн топ 100 нээлтийн нэгээр нэрлэж байжээ. Бас 2019 онд “Европын шилдэг цэвэр технологийн стартап” шагналыг Europas Awards арга хэмжээнээс хүртэж байв.
Өнгөрсөн хугацаанд Solar Foods $60 саяын хөрөнгө оруулалт татаж чадсаны 10 сая евро нь Финландын “Pharmacy Pension Fund” сангаас, 15 сая евро нь Данийн “Danske Bank Growth” сангаас гарчээ.
Эх сурвалж: DPA