Монгол Улсын Засгийн газраас 2024 оныг “Бүсчилсэн хөгжлийг дэмжих жил” болгон зарласан энэ хүрээнд “Улаанбаатар-Бүсчилсэн хөгжил” форум төрийн ордонд эхэллээ. Улаанбаатар хот нь Монгол улсын нийт газар нутгийн 0.3 хувийг эзлэх бөгөөд нийт хүн амын 47.6 хувь нь энд суурьшиж байна. Тэгвэл сүүлийн 30 жилд хүн амын тал нь нийслэлд төвлөрснөөс Улаанбаатар хотын даац хэтэрч, үүнийг дагаад түгжрэл, утаа, хог бохирдол зэрэг олон бэрхшээл бий болжээ. Энэ бүхэн хот төлөвлөлтийн алдаатай бодлоготой холбоотой гэдгийг Монгол Улсын Ерөнхий сайд Л.Оюун-Эрдэнэ “Улаанбаатар-бүсчилсэн хөгжил” илтгэлдээ дурьдлаа.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр: Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөн буюу “Хүнсний хувьсгал” үргэлжлээд 1 жил 8 сар болсон байна. Энэ хугацаанд бид нийслэлийн хүнсний асуудлыг тусад нь авч хэлэлцэх нь зүйтэй гэж үзсэн. “Хүнсний хувьсгал”-ын хүрээнд батлагдсан УИХ-ын 36 дугаар тогтоолд ч нийслэлийн хийх ажил тодорхой тусгагдсан байгаа. Тиймээс “Улаанбаатар бүсчилсэн хөгжил”-д хүнсний хангамж, аюулгүй байдлын асуудал том сэдэв болон яригдаж байна.
Монгол Улс жилд 1 тэрбум доллар буюу ойролцоогоор 4 их наяд төгрөгийн импортын хүнс авч нийслэл хотод төвлөрүүлэн 21 аймаг 330 сумдад хүргэдэг. Тэгэхээр импортоор авч буй хүнсийг аюулгүй тээвэрлэх, зориулалтын агуулахын асуудлыг анхаарах ёстой юм. Орон нутагруу хүнсийг яаж эрүүл, аюулгүй тээвэрлэх вэ? Хүнсийг зориулалтын тээврийн хэрэгслээр тээвэрлэж байж аюулгүй байдал нь хангагдана. Энэ мэтчилэн асуудлыг “Улаанбаатар бүсчилсэн хөгжил”-д тусгаж өгсөн байгаа.
Нийслэл хот 204 хороотой. Үүнээс 189 хороо нь төвийн зургаан дүүрэгт, 15 хороо нь захын гурван дүүрэгт байдаг. Хороодын хүн амын тооны зөрүүнээс шалтгаалж, зарим хорооны иргэд төрийн үйлчилгээг шуурхай авч чадахгүйд хүрсэн. Иймээс нийслэлийн есөн дүүргийг 42 нэгжид хуваахаар төлөвлөжээ. Ингэснээр иргэд төрийн үйлчилгээг 15-20 минутад бүрэн авах боломжтой болно гэж хотын удирдлагууд үзэж байна.
Форум “Дэд бүтэц-Эрчим хүч, дулаан хангамж”, “Орон сууцжуулах бодлого, нийгмийн суурь үйлчилгээний хүртээмж”, “Бүс нутгийн эдийн засгийн интеграцичлал, дагуул хот”, “Засаглал, хууль эрх зүйн шинэчлэл” гэсэн дөрвөн сэдвийн хүрээнд үргэлжилнэ
