Монгол Улсын Ерөнхийлөгч Ухнаагийн Хүрэлсүх зарлиг гарган, Эзэн Богд Чингис хааны мэндэлсний 863 жилийн ой, “Монгол бахархлын өдөр”-ийг тохиолдуулан түүхт 60 жилийн ойгоо тэмдэглэж буй Хүнсний Үйлдвэрлэл, Технологийн Их сургуулийг Алтан гадас одонгоор шагналаа.
Шагналыг Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр гардуулан
60 жилийн ойн баярт оролцлоо. Мөн салбартаа олон жил тууштай ажиллан, хүнс хөдөө аж ахуйн салбарын боловсон хүчин бэлтгэж буй эрдэмтэн багш нарт төрийн дээд одон медал гардууллаа.
Их, дээд сургууль бол нийгмийн хөгжлийн тэргүүн эгнээнд байж, салбар салбарын олон мянган дээд боловсролтой үндэсний сэхээтнийг бэлтгэж, шинжлэх ухааны сэтгэлгээг суурьшуулан, судалгааны суурь ажлуудыг туурвиж нийгмийн амьдралын салаа мөчир бүрд шинжлэх ухаан, технологийн дэвшлийг бодит ажил хэрэг болгох учиртай. Иймд эрчим хүч, түлш шатахуун, хүнсний бүтээгдэхүүн зэрэг стратегийн бараа, үйлчилгээгээ дотоодоосоо бүрэн хангах чадвартай, “үйлдвэрлэгч, баялаг бүтээгч улс орон” болж, эдийн засгийн тусгаар тогтнолоо бататган бэхжүүлэх учиртай.
Хүнсний Үйлдвэрлэл, Технологийн Их сургуулийн хамт олон болон тус сургуулийн 30 гаруй мянган төгсөгч “Хүнсний хувьсгал” хөдөлгөөнийг тууштай дэмжин ажиллаж улс орныхоо хөгжил дэвшил, монгол хүнийг эрүүл, чанартай хүнсээр хангах үйлсэд бодит хувь нэмэр оруулж байгаа юм.
Эх орныхоо олон мянган залуучуудыг соён гэгээрүүлж, шинжлэх ухаан, эрдэм мэдлэгийн үрийг тарьж, эх орныхоо хөгжил дэвшлийн түүчээ болсон Хүнсний Үйлдвэрлэл, Технологийн Их сургуулийн үе үеийн эрдэмтэн багш нартаа түүхт 60 жилийн ойн мэнд хүргэе.
