Монгол Улсын Ерөнхийлөгч У.Хүрэлсүх “Хүнсний хангамж, аюулгүй байдал” үндэсний хөдөлгөөний хүрээнд “Очирдагинас” ХХК-ийн үйлдвэрт ажиллалаа.

Мөн Хүнс, хөдөө аж ахуй, хөнгөн үйлдвэрийн сайд Ж.Энхбаяр, Монгол Улсын Ерөнхийлөгчийн Үйлдвэр, үйлчилгээний бодлогын зөвдөх Ч.Даваабаяр, Сангийн яамны Төрийн нарийн бичгийн дарга Ж.Ганбат болон салбарын төлөөллүүд ажиллалаа.

Мах, махан бүтээгдэхүүний салбарын томоохон төлөөлөл “Очирдагинас” ХХК 2022 онд нэг үйлдвэртэй байсан бол “Хүнсний хангамж, аюулгүй байдал” үндэсний хөдөлгөөний үр дүнд хоёр шинэ үйлдвэр ашиглалтад оруулж, хүчин чадлаа гурав дахин нэмэгдүүлэн нийт гурван үйлдвэрээс бүрдсэн экспортын цогцолбор үйлдвэрээ байгуулан үйл ажиллагаагаа өргөжүүлжээ.

“ЭКСПОРТЫН ҮЙЛДВЭР” нь 70 гаруй нэр төрлийн чанамал, хагас утлагат, давхар утлагат хиам, элэгний нухаш, зайдас, утсан махан бүтээгдэхүүн үйлдвэрлэдэг байна.

Санхүүжилтийн үр дүн:

• Үйлдвэрийн хүчин чадал хоёр дахин өсөж, өдөрт 45–50 тонн бүтээгдэхүүн үйлдвэрлэдэг болсон
• Бүтээгдэхүүний нэр төрөл 70 болж нэмэгдсэн /үүнээс 15 нэр төрөл нь импортыг орлох бүтээгдэхүүн/
• Хөргөлтийн зоорь 2000 тонн багтаамжтай болж өргөтгөгдсөн
• Үйлдвэрийн талбай гурав дахин нэмэгдэж, нийт 9150 м² бүхий цогцолбор болсон. Ингэснээр дотоодын үйлдвэрлэл ба экспортын өрсөлдөх чадварыг нэмэгдүүлэхэд хувь нэмэр оруулж байгаа юм.

2018 оноос гэрийн тэжээвэр амьтанд зориулсан хоёр төрлийн бүтээгдэхүүнээ Солонгосын зах зээлд нийлүүлж байсан бол өдгөө 20 төрөл болж нэмжээ.

Ерөнхийлөгч У.Хүрэлсүх “Хүнсний хувьсгал”-д нэгдэн, иргэдээ эрүүл, аюулгүй хүнсээр хангах, улмаар хүнс экспортлогч орон болох зорилтын төлөө хүчин зүтгэж, олон арван ажлын байр бий болгон, татвараа төлж байгаа аж ахуйн нэгжүүд, баялаг бүтээгчдэд талархал илэрхийллээ.

“Хүнсний хангамж, аюулгүй байдал” үндэсний хөдөлгөөний хүрээнд 3,000 гаруй аж ахуйн нэгжид 1.2 их наяд төгрөгийн урт хугацаатай, бага хүүтэй, хөнгөлөлттэй зээл олгоод байна.

Үүний дүнд 53 үйлдвэр ашиглалтад орж, зөвхөн нэг жилд 44 мянган ажлын байр бий болсны зэрэгцээ хүнсний бүтээгдэхүүний нэр төрөл 1,000 гаруйгаар нэмэгдсэн.