Монгол Улсын Ерөнхийлөгч У.Хүрэлсүх “Хүнсний хангамж, аюулгүй байдал” үндэсний хөдөлгөөний хүрээнд “Газар шим” ХК-ийн үйлдвэрт ажиллалаа.
Мөн Хүнс, хөдөө аж ахуй, хөнгөн үйлдвэрийн сайд Ж.Энхбаяр, Монгол Улсын Ерөнхийлөгчийн Үйлдвэр, үйлчилгээний бодлогын зөвдөх Ч.Даваабаяр, Сангийн яамны Төрийн нарийн бичгийн дарга Ж.Ганбат болон салбарын төлөөллүүд ажиллалаа.
“Газар шим үйлдвэр” ХК нь 1999 оноос нөөшилсөн бүтээгдэхүүн болох салат, өргөст хэмх үйлдвэрлэлээр үйл ажиллагаагаа эхлүүлсэн. Одоогийн байдлаар өргөст хэмх, салат, ногооны нухаш, жимсний компот, эрүүл мэндийн “Артишок” ундаа зэрэг 60 гаруй нэр төрлийн бүтээгдэхүүн үйлдвэрлэж байна.
“Хүнсний хувьсгал” үндэсний хөдөлгөөн болон “Атар-4” аяны хүрээнд 2023-2025 онд Хөдөө аж ахуйн тогтвортой үйлдвэрлэлийг дэмжих хөнгөлөлттэй зээлийн санхүүжилтэд хамрагдан хүчин чадлаа нэмэгдүүлж 2024 онд 8.29 сая ширхэг бүтээгдэхүүн үйлдвэрлэсэн бол 2025 онд 10.8 сая ширхэг бүтээгдэхүүн үйлдвэрлэж байна.
Шинэ үйлдвэр нь цагт 3,000-6,000 бүтээгдэхүүн үйлдвэрлэдэг бөгөөд шинээр 5 нэр төрлийн 22 бүтээгдэхүүн зах зээлд гарган нийт борлуулалтын орлого 35,6% өсжээ. Мөн шинэ үйлдвэртээ физик, хими, биологийн аргаар 1 цагт 6 тонн хаягдал ус урьдчилан цэвэршүүлэх, лаг ялгах, боловсруулах цогц барилга байгууламжийг ашиглалтад оруулжээ. Ингэхдээ үйлдвэрийн хаягдал усанд агуулагдах бохирдуулах бодисын зөвшөөрөгдөх дээд хэмжээг барьж, үзүүлэлтийн шаардлага хангасан хаягдал усны байгууламжтай болжээ.
Сүүлийн нэг жил хагасын хугацаанд хугацаанд үйлдвэрийн ажилтны цалин хангамж 48 хувь өссөн ба бүтээмжийг 30 хувь өсгөжээ.
Ингэснээр 2023 оноос хойш нэгж бүтээгдэхүүний үйлдвэрлэлийн өртгийг тогтвортой барьж амжилттай ажиллаж байгаа юм.
