“Атар IV” тариалангийн тогтвортой хөгжлийн аяны нээлт, Сэлэнгэ аймгийн “Газар тариалан эрхлэгч, төмс, хүнсний ногоо тариалагчдын зөвлөгөөн” өнөөдөр аймгийн АДБ-ийн “Сэлэнгийн долгио” чуулгын байранд боллоо.
Монгол Улсын “Бүсчилсэн хөгжлийн бодлого”, “Хүнсний хангамж, аюулгүй байдал” үндэсний хөдөлгөөн, “Атар 4 тариалангийн тогтвортой хөгжлийн аяны хүрээнд төр, хувийн хэвшлийн хамтын оролцоог нэмэгдүүлэх, төрийн бодлого, шийдвэр, салбарт нэвтрүүлсэн дэвшилтэт технологийг сурталчлах зорилго дор болж буй уг үйл ажиллагаанд 250 гаруй төлөөлөл оролцлоо.
Монгол Улсын Засгийн газрын 47 дугаар тогтоолоор “Атар IV” аяныг улсын хэмжээнд 4 жилийн хугацаатайгаар өрнүүлэх юм. Сэлэнгэ аймаг улсын хэрэгцээт үр тарианы 43 хувь, төмсний 25 хувь, хүнсний ногооны 34 хувь, байгалийн хадлангийн 13.0 хувийг хангаж, үр тарианы тариалалт, хадлан бэлтгэлээрээ улсдаа тэргүүлдэг.
Өнгөрсөн хугацаанд газар тариалангийн үйлдвэрлэлийг дэмжих зорилгоор анхан шатны үр үржүүлгийн төв, үтрэм байгуулахад 1 аж ахуйн нэгжид 1 тэрбум төгрөг, эргэлтийн хөрөнгийг сайжруулахад 80 аж ахуйн нэгж, 48 иргэнд 22,2 тэрбум төгрөг, зоорийн аж ахуй байгуулахад 3 аж ахуйн нэгж, 1 иргэнд 1 тэрбум төгрөг, техник, тоног төхөөрөмж, тусгай тээврийн хэрэгслийн хүчин чадлыг нэмэгдүүлэхэд 15 аж ахуйн нэгж, 4 иргэнд 9,5 тэрбум төгрөг, хүнсний ногооны үйлдвэрлэл эрхлэгчдийн эргэлтийн хөрөнгийг сайжруулахад 4 аж ахуйн нэгж, 107 иргэнд 4,6 тэрбум төгрөг буюу нийт 263 аж ахуйн нэгж, иргэнд 38,3 тэрбум төгрөгийн хөнгөлөлттэй зээлийг олгож, газар тариалангийн тогтвортой үйлдвэрлэлийг хангахад дэмжлэг үзүүлжээ.
Сэлэнгэ аймаг “Органик хүнс нийлүүлэгч” аймаг болох зорилт тавьсан. Үүний хүрээнд орон нутгийн органик хүнс үйлдвэрлэгчдээ дэмжих, эрүүл хүнсээр дотоодын хэрэгцээгээ хангах зорилгоор аймгийн Засаг дарга Н.Лхагвадорж “Монгол хөрс дөрвөн улирлын хүлэмж” ХХК, “Цахим ертөнц”, Юнител ХХК-ийн Сэлэнгэ салбартай хамтран ажиллах санамж бичиг байгууллаа.
“Атар IV” аяны хүрээнд Сэлэнгэ аймаг усалгаатай газар тариаланг хөгжүүлэх, тэжээлийн ургамлын тариалалтыг нэмэгдүүлэх, услалтын системийг сайжруулах, үр сортыг шинэчлэх, тариалангийн үйлдвэрлэлд дэвшилтэт технологийг нэвтрүүлж, хөрс, уур амьсгалын онцлогт тохирсон шинэ болон ашигт таримлыг нутагшуулах.
Мөн шинээр 50,4 мянган га талбайг эзэмшүүлж, тариалалтаа нэмэгдүүлэх зэрэг газар тариалангийн салбарт хийж хэрэгжүүлэх ажил хэрэгч шийдлүүдийг гаргаад байгаа юм.