Азийн Хөгжлийн Банк (АХБ) Ази, Номхон далайн бүс нутагт хэрэгжүүлж буй үйл ажиллагааныхаа хөгжлийн нөлөөг нэмэх зорилгоор одоогийн хөрөнгийн баазаа ашиглан ирэх арван жилд үйл ажиллагаагаа 50 хувиар өргөжүүлэх төлөвлөгөө баталлаа.
Хөрөнгө ашиглалтын төлөвлөгөө (ХАТ) нь АХБ-ны нэг жилд батлагдах санхүүжилтийн дүнг 2024 оны 24 тэрбум ам.доллараас 2034 он гэхэд 36 тэрбум ам.доллар болгон нэмэх юм. Энэхүү өргөтгөсөн санхүүжилт нь бүс нутгийг хөгжүүлэхэд чиглэсэн эн тэргүүний асуудлуудыг шийдвэрлэх АХБ-ны хөгжиж буй гишүүн орнууд (ХБГО)-ын хүчин чармайлтыг дэмжинэ.
“Энэхүү эрчимтэй төлөвлөгөө нь бүс нутгийн хувьсан өөрчлөгдөж буй эрэлт хэрэгцээнд нийцэхийн зэрэгцээ иргэдийн амьдралыг сайжруулж, эх дэлхийгээ хамгаалахад чиглэсэн АХБ-ны үйл ажиллагааны үр нөлөөг бэхжүүлэх юм.” гэж АХБ-ны Ерөнхийлөгч Масацугу Асакава хэлжээ.
“Өсөн нэмэгдсэн зээлийн хүчин чадлаа ашиглан шинэ ХАТ-г хэрэгжүүлснээр бид бүс нутаг даяарх үйл ажиллагааныхаа чанар, үр дүнг дээшлүүлж, нарийн төвөгтэй асуудлуудыг шийдвэрлэх стратегийн хөрөнгө оруулалт хийх боломжтой болж байна” хэмээн тодруулав.
ХАТ нь АХБ-ны одоо үргэлжилж буй өөрчлөлтийн дараагийн алхам юм. Энэ нь AХБ-ны санхүүжилтийн хүчин чадлыг ихээхэн нэмэгдүүлсэн 2023 оны хөрөнгийн удирдлагын шинэчлэл, өнгөрсөн жил таван үндсэн чиглэлд томоохон зорилтуудыг тодорхойлсон стратегийн шинэчлэлд тулгуурлаж байна.
Мөн АХБ нь хамгийн ядуу, эмзэг гишүүн орнууддаа зориулсан хамгийн том тэтгэлгийн эх үүсвэр болох Азийн хөгжлийн сангаа сүүлд нэмэгдүүлж, хөнгөлөлттэй зээл олгох үйл ажиллагаагаа бэхжүүлсэн.
ХАТ нь ирэх 2-3 жилийн хугацаанд АХБ-ны ажилтнуудын тоо нэмэгдэж, техникийн туслалцааны нөөц өргөжсөнтэй уялдан АХБ-ны зээл олголт огцом нэмэгдэнэ гэж төсөөлж байна.