Жин хасаж байгаа, хоолны дэглэм барьж байгаа хүмүүсийн хувьд “чихэргүй кола” буюу “zero cola”-г жингийн илүүдэлд нөлөөлөхгүй хэмээн үзэж хэрэглэх тохиолдол гардаг. Гэтэл үнэндээ “чихэргүй кола” гэх энэхүү бүтээгдэхүүнд чихэр орлуулагчийг хэрэглэдэг бөгөөд чихэр орлуулагч нь бидний бодож байгаа шиг эрүүл мэндэд тийм ч тустай зүйл биш болох нь судалгаагаар батлагдсан байна. Ингээд судалгааны үр дүнтэй дэлгэрэнгүй танилцацгаая.
1. Судалгааны үр дүн
Чихэр агуулаагүй гэх шошготой ундаа нь бусад чихэр агуулсан чихэрлэг ундаатай ижил сөрөг үр дагавартай болохыг эрдэмтэд 1.2 сая хүн дээр, 20 жилийн турш хийсэн судалгаагаар баталсан байна.
20 жилийн судалгааны явцад нийт 1.2 сая хүнээс 137,310 хүн нь нас барсан бөгөөд өдөрт хэрэглэх чихэрлэг ундааны хэрэглээ 250мл-ээр нэмэгдэх тусам нас барах магадлал нэмэгдэж байгааг тэд тогтоожээ. Судалгааны үр дүнд: Чихэрлэг хийжүүлсэн ундаа тогтмол хэрэглэх нь зүрхний өвчлөлөөр нас барах магадлалыг 13%, бусад шалтгаанаар нас барах магадлалыг 5%-иар нэмэгдүүлж байсан нь батлагдсан байна.
2. Чихэр орлуулагч илүү хортой
Судалгаанд оролцогсдын хувьд чихэртэй ундаа бусдаас ихээр хэрэглэж байсан хүмүүсийн хувьд зүрх судасны өвчнөөр нас барах магадлал 20%, бусад өвчнөөр нас барах магадлал 12%-аар нэмэгдэж байсан аж.
Харин чихэр орлуулагчтай ундаа ихээр хэрэглэж байсан хүмүүсийн хувьд зүрх судасны өвчлөлөөр нас барах магадлалыг 23%, бусад өвчнөөр нас барах магадлалыг 12%-аар нэмэгдүүлж байсан гэнэ.
“Чихэр орлуулагчтай ундааг хэтрүүлэн хэрэглэх нь ерөнхийдөө зүрх судасны өвчнөөр болон бусад төрлийн өвчнөөр нас барах магадлалыг илүү ихээр нэмэгдүүлж байсан. Магадгүй энэхүү туршилтын үр дүнг хараад хүн төрөлхтөн чихэртэй ундаа уухаас татгалзах болов уу” хэмээн Хятад дахь Чжэнчжоу Их сургуулийн эрдэмтэн Хунги Ли хэлжээ.
3. Буруу ойлголтоо засах
2018 оноос Их Британид 100 мл тутамд 8гр-аас дээш элсэн чихэр агуулж байгаа ундааны татварыг нэмэгдүүлж, 24 пенни болсон байна. Тиймээс дээрх судалгааны үр дүнг илүү сонирхож эхэлсэн аж. Гэвч чихэрлэг ундааны татварыг нэмэгдүүлснээр ард иргэд чихэр орлуулагчтай ундаа худалдаж авч эхэлсэн бөгөөд зарим нь өндөр дүнтэй татвар төлөхгүйн тулд ундааны орц найрлагыг өөрчилж эхэлжээ.
Эрдэмтэд: “Та чихэр орлуулагчтай ундаа ууснаар өөрийн эрүүл мэндэд учрах эрсдэлийг бууруулж байна гэж битгий бодоорой. Аль ч төрлийн ундаа хэрэглэсэн таны амь насанд учрах эрсдэл их хэвээр байгаа учир ундааны оронд цэвэр ус уухыг сонгосон нь зүйтэй” гэж хэлсэн байна.
4. Ундаа үйлдвэрлэгч
Харин ундаа үйлдвэрлэгчдийн хувьд эрдэмтэдтэй огт санал нэгдэхгүй байгаа гэнэ. Британийн согтууруулах бус ундаа үйлдвэрлэгчдийн холбооны ажилтан Гэвин Партингтон: “Согтууруулах бус ундааг хоолны дэглэмийг тэнцвэржүүлэхийн тулд хэрэглэх нь хэвийн зүйл. Бидний салбар ард иргэдийн илүүдэл жинтэй тэмцэхэд чухал үүргийг гүйцэтгэж байгаа гэдгээ мэдэж байгаа учир өөрийн бүтээгдэхүүний найрлагыг илүү аюулгүй болгох тал дээр анхаарал хандуулж байгаа” гэжээ.
