Монгол Улсын Ерөнхийлөгч Ухнаагийн Хүрэлсүхийн урилгаар Туркменистан Улсын Ерөнхийлөгч Сердар Бердымухамедов Монгол Улсад төрийн айлчлал хийж байна.
Айлчлалын хүрээнд “Монгол-Туркменистаны бизнес форум”-ыг МҮХАҮТ зохион байгууллаа.
Форумыг нээж Монгол Улсын Их Хурлын гишүүн, Шадар сайд Т.Доржханд, Туркменистан Улсын Шадар сайд, Туркменистаны Аж үйлдвэрчний болон бизнес эрхлэгчдийн холбооны захирлын зөвлөлийн дарга Нокергулы Атагулыев нар үг хэллээ. Мөн Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Монгол Улсын Ерөнхийлөгчийн Эдийн засгийн бодлогын зөвлөх Б.Даваадалай нар оролцлоо.
2024 хоёр улсын Засгийн газар, салбарын яамд хооронд Тээвэр, ложистик, Хөдөө аж ахуй, мал аж ахуйн, Соёл, аялал жуулчлалын салбаруудад гол гэрээ хэлэлцээр, санамж бичгүүдийг амжилттай байгуулсан нь хоёр орны найрсаг харилцаа, хамтьн ажиллагааны суурийг улам бататгалаа гэдгийг сайдууд хэлж байлаа.
Тус форумд хоёр талын төлөөллүүд, хүнс, хөдөө аж ахуй, уул уурхай, барилга, эрчим хүч, тээвэр ложистик зэрэг 20 гаруй салбарын 200 орчим бизнес эрхлэгчид оролцсон юм. Ашхабад хотноо 2024 оны 10 дугаар сард болсон Монгол-Туркменистаны бизнес форумын үеэр хоёр улсын бизнес эрхлэгчид хоёр улсын худалдаа, эдийн засгийн харилцаа одоогоор төдийлөн өндөр түвшинд хүрээгүй байгаа ч, сүүлийн жилүүдэд аажмаар өргөжин тэлж, шинэ салбарууд руу хамтран ажиллах сонирхол нэмэгдэж байгааг талууд онцолж байлаа.
Мөн Туркмен үндэсний хивсний үзэсгэлэн худалдааны нээлт боллоо. Үзэсгэлэнгийн хүрээнд хивснээс гадна Туркменийн уламжлалт үндэсний хувцас, гар урласан гоёл чимэглэлүүд ч дэлгэгдэх ба эдгээр нь угсаатны соёл, гоёлын хэв маяг, гар урлалын уран нарийн чадварыг мөн адил танилцуулж байна.
Энэхүү үзэсгэлэн нь Монгол-Туркменистаны соёлын харилцааг гүнзгийрүүлж, гар урлалын үнэ цэнийг олон нийтэд ойлгуулах, харилцан суралцах, соёлын солилцоог дэмжих чухал ач холбогдолтой юм. Нэг хивсийг бүтээхэд хэдэн сараас бүтэн жил хүртэл хугацаа шаардагддаг. Нэхэгч бүсгүйчүүд хивс бүрийн хээ угалзыг өөрсдийн овог, гэр бүл, нутгийн онцлогт тохируулан гаргаж, утга бэлгэдэл, түүх соёлыг нь шингээхээс гадна нэхэхдээ босоо эсвэл хэвтээ нэхмэл машин ашиглах ба бүх үйл явц гар аргаар, өндөр нямбай хийцтэйгээр явагддаг ажээ.
