Зээлийн батлан даалтын сан /ЗБДС/-гийн нийт хөрөнгийн хэмжээ 2025 оны нэгдүгээр улиралд 303.4 тэрбум төгрөгт хүрчээ. Энэ нь 2024 оны мөн үеийнхээс 10.1 тэрбум төгрөгөөр нэмэгдсэн дүн юм.
Батлан даалт олгосон зээлийн үлдэгдэл 2024 оны мөн үеийнхээс 3.5 дахин өсөж 782.8 тэрбум төгрөгт хүрчээ. Тус сангаас эхний улиралд 21.2 тэрбум төгрөгийн 841 батлан даалт шинээр олгосон нь 2024 оны мөн үеийнхээс 5.2 дахин өссөн үзүүлэлт болсон аж.
Орон нутагт энэ сангаас олгосон батлан даалтыг бүсчлэн гаргажээ. Тухайлбал, Баруун бүс 3.4 тэрбум төгрөгийн зээлд 94 батлан даалт, Хангайн бүс 20.8 тэрбум төгрөгийн зээлд 551 батлан даалт, Төвийн бүс 4 тэрбум төгрөгт 95 батлан даалт, Зүүн бүс 4.7 тэрбум төгрөгт 94 батлан даалт олгосон байна.
Улаанбаатар хотод 3.6 тэрбум төгрөгийн зээлд 7 батлан даалт байна. Батлан даалтын нэг зээлдэгчийн үлдэгдэл оны эхний улиралд дунджаар Улаанбаатар хотод 237.4 сая төгрөг, орон нутагт 23.5 сая төгрөг ногджээ. Орон нутгийн хувьд Зүүн бүсэд нэг зээлдэгчид олгосон батлан даалтын дундаж үлдэгдэл хамгийн их их буюу 28.6 сая төгрөг байгаа аж.
Нийт батлан даалтын 1.9 хувийг бөөний болон жижиглэн худалдаа, 4.8 хувийг боловсруулах үйлдвэрлэл, 0.7 хувийг мэдээлэл, холбооны салбарт олгожээ. Шинэ хоршоо хөдөлгөөн, ипотекийн зээлийн батлан даалт 92.6 хувийг эзэлсэн байна.
Сангийн батлан даалтын 54.8 хувийг Хаан банк, 32.8 хувийг Төрийн банк, 7 хувийг Капитрон банк, 2.5 хувийг Худалдаа хөгжлийн банк, 0.7 хувийг Голомт банк, 0.2 хувийг Ариг банкнаас олгосон зээл эзэлсэн байх юм.
ЗБДС-аас олгож буй батлан даалтын эх үүсвэрийн 87.1 хувийг Шинэ хоршоо хөдөлгөөн, 7.2 хувийг Азийн хөгжлийн банкны МОН-3338 төсөл, 5.7 хувийг ипотек, 0.3 хувийг Жижиг, дунд үйлдвэрийг хөгжүүлэх сан бүрдүүлжээ. Мөн олгосон батлан даалтын дундаж хугацаа 72.1 сар буюу 6.1 жил байна Энэ нь 2024 оны 1 дүгээр улиралтай харьцуулахад 152. 6 сар буюу 12. 7 жилээр буурсан үзүүлэлт юм.
Тус сангийн батлан даалттай зээлийн 90.5 хувийг иргэн, 9.5 хувийг аж ахуйн нэгжид олгосон байна. Аж ахуйн нэгжийн батлан даалтын 7.1 тэрбум төгрөгийг боловсруулах үйлдвэр 1.3 тэрбум төгрөгийг бөөний болон жижиглэн худалдаанд, 0.5 тэрбум төгрөгийг мэдээлэл, холбооны салбарт олгожээ. Иргэнд олгосон батлан даалтын 26.6 тэрбум төгрөг Шинэ хоршоо хөдөлгөөн, 6.4 тэрбум төгрөг ипотекийн зориулалттай байна.
Мөн сангийн хөрөнгийн өгөөж 4.7 хувь гарсан нь 2023 оныхоос 3 пунктээр ахисан үзүүлэлт юм.
Сангийн нийт үлдэгдэлд эзлэх чанаргүй батлан даалтын хувь 1.3 болж 2024 оны эхний улиралтай харьцуулахад 4 пунктээр багасаж сангийн чанаргүй батлан даалтын үлдэгдэл 6 тэрбум төгрөгт хүрчээ.
Чанаргүй батлан даалтын үлдэгдлийг салбараар авч үзвэл:
- 50. 2 хувь нь боловсруулах үйлдвэр,
- 23. 6 хувь нь бөөний болон жижиглэн худалдаа,
- 9. 6 хувь нь барилга, 5 хувь нь удирдлагын болон дэмжлэг үзүүлэх салбарт,
- 3. 1 хувь нь мэргэжлийн, шинжлэх ухаан болон техникийн салбарт,
- 2. 8 хувь нь хүний эрүүл мэнд,
- 2. 6 хувь нь боловсрол,
- 2. 1 хувь нь хөдөө аж ахуй,
- 1 хувь нь тээвэр, агуулахын үйл ажиллагаанд ногдож байгааг СЗХ-ны нэгтгэсэн тайланд дурджээ.