Улсын Их Хурлын даргын 82 дугаар захирамжаар байгуулагдсан Жижиг, дунд үйлдвэр, үйлчилгээг дэмжих тухай хуулийн хэрэгжилттэй танилцаж, бичил үйлдвэр, үйлчилгээ эрхлэгчдийг дэмжих тогтолцоог оновчтой болгох чиглэлээр санал, дүгнэлт гаргах, холбогдох хуулийн төсөл боловсруулах үүрэг бүхий хамтарсан ажлын хэсгийн хурал боллоо.

Хуралд УИХ-ын гишүүн, ажлын хэсгийн ахлагч Д.Батлут, УИХ-ын гишүүн Ж.Бат-Эрдэнэ, УИХ-ын гишүүн М.Бадамсүрэн, Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон ажлын хэсгийн гишүүд, холбогдох албаныхан оролцлоо.

Мөн Парламентын судалгаа, хөгжлийн хүрээлэн болон “Хөгжлийн шийдэл” ТББ-ын гадаад орнуудын судалгаа, салбарын хууль тогтоомжийг шинэчлэх хэрэгцээ шаардлагын судалгаатай танилцаж, санал солилцлоо.

Өрхийн, бичил, ЖДҮҮ-ний салбарын хууль тогтоомж шинэчлэх хэрэгцээ шаардлага тодорхойлох судалгаа нь:

• Монгол Улсын хэмжээнд өрхийн болон бичил, жижиг, дунд үйлдвэрлэл, үйлчилгээ эрхлэгчдийн тулгамдаж буй асуудлыг тодорхойлох, тэдний бодит хэрэгцээнд суурилсан хууль тогтоомж, бодлогын шинэчлэл хийх хэрэгцээ шаардлага байгаа эсэхийг тодруулах, санал зөвлөмж боловсруулах зорилготой юм.

Тус судалгаагаар дараах дүгнэлтүүд гарчээ:

• ЖДБ эрхлэгчдийн зээл, санхүүжилттэй холбоотой зардлыг бууруулахад чиглэсэн хууль эрх зүйн шинэчлэл хийх
• Арилжааны банктай өрсөлдөхүйц ЖДБ эрхлэгчдийг дэмжсэн хүү, хугацаа, нөхцөл бүхий санхүүгийн механизмыг бий болгоход хууль тогтоомж, бодлогын өөрчлөлт хийх, төр-хувийн хэвшлийн түншлэлээр санхүүгийн эх үүсвэрийг нэмэгдүүлэх
• Дотоодын үйлдвэрлэгчдийн бүтээгдэхүүнийг экспортод гаргахад бодлого, хөтөлбөрийн дэмжлэг бий болгох
• Бизнес эрхлэгчдийн эрх зүйн чадавхыг нэмэгдүүлэх, хамгаалахад чиглэсэн тогтолцоог бий болгох
• Бизнесийн эко систем, орчныг сайжруулахад чиглэсэн хууль тогтоомжийн шинэчлэл, бодлого, хөтөлбөрүүдийг боловсруулж хэрэгжүүлэх
• Боловсролын салбарт ур чадвартай ажиллах хүчин бэлтгэхэд чиглэсэн бодлого хөтөлбөр хэрэгжүүлэх, хууль тогтоомжийн өөрчлөлт хийх

Мөн олон улсын туршлагаас үзэн бизнес эрхлэгчдэд зээл, хөрөнгө оруулалт, татварын таатай орчинг бүрдүүлж, бодлогоор дэмжих хэрэгтэй хуралд оролцогчид онцолж байв.

Аж ахуйн нэгж, бизнес эрхлэгчдэд татварын таатай орчинг бий болгосноор иргэдэд ажлын байрыг бий болгох, аж ахуйн нэгжийн үйл ажиллагааны хөрөнгө оруулалтыг нэмэгдүүлэх юм.