Хүнс, хөдөө аж ахуй, хөнгөн үйлдвэрийн яам, НҮБ-ын Хүнс, хөдөө аж ахуйн байгууллага болон Хөгжлийн хөтөлбөрөөс хэрэгжүүлж буй “СКАЛА” төсөлтэй хамтран “Парисын хэлэлцээрийг хэрэгжүүлэх үндэсний тодорхойлсон хувь нэмэр 3.0’’, Хүнс, хөдөө аж ахуйн салбарын зорилт, арга хэмжээний шинэчлэлтийг хэлэлцэх хурлыг 2025.06.04-ны өдөр зохион байгууллаа.
НҮБ-ын ХХААБ-ын Монгол дахь суурин төлөөлөгч Чиньюнь Дяо семинарыг нээж үг хэлэв. Хурлаар хүнс, хөдөө аж ахуй, хөнгөн үйлдвэрийн салбарын уур амьсгалын өөрчлөлтийг сааруулах, дасан зохицох бодлого, тэргүүлэх зорилтууд, арга хэмжээ, малын төрөл хоорондын зохистой харьцаа, сүргийн бүтцийн хөдлөл зүй, бэлчээрийн байгалийн аясаар сэргэн сайжрах чадавхийг хадгалах замаар хөрсний хүлэмжийн хий алдагдахаас сэргийлэх нь зэрэг сэдвүүдийн хүрээнд мэдээлэл өгч, хэлэлцүүлэг өрнүүллээ.
Хуралд ХХААХҮЯ-ны Мал аж ахуйн бодлогын хэрэгжилтийг зохицуулах газар, Байгаль орчин, уур амьсгалын яам, НҮБ-ын Хөгжлийн хөтөлбөр, НҮБ-ын ХХААБ, аймаг, нийслэлийн Хүнс, хөдөө аж ахуйн газрын Мал аж ахуйн хэлтсийн дарга, мэргэжилтнүүд, Байгаль орчны газрын төлөөлөл, Ус цаг уур, орчны судалгаа, мэдээллийн хүрээлэн, Уур амьсгалын өөрчлөлт судалгаа, хамтын ажиллагааны төв, Мал аж ахуйн эрдэм шинжилгээний хүрээлэн, Их дээд суургууль, ТББ-ууд, хөгжлийн түншүүд, залуусын төлөөлөл оролцов.