Ховд аймагт 3000 орчим хөгжлийн бэрхшээлтэй иргэн бий. Үүний 10 орчим хувь нь ажил хөдөлмөр эрхэлж байна.
2025 оныг хөгжлийн бэрхшээлтэй иргэдийн хөдөлмөр эрхлэлтийг дэмжих жил болгосон. Үүнтэй холбогдуулан мэргэжлийн байгууллагууд олон талт ажил санаачилж, үе шаттай хэрэгжүүлж байна.
Тухайлбал, Ховд аймагт хөгжлийн бэрхшээлтэй иргэдэд зориулсан гарааны бизнесийг дэмжих “Start up” уралдаан зарлалаа.
Энэ нь Ховд аймгийн хэмжээнд хөгжлийн бэрхшээлтэй хүнийг хөдөлмөр эрхлэх, хувиараа үйлдвэрлэл, үйлчилгээ эрхлэх, тэдгээрийн онцлог хэрэгцээнд нь нийцсэн ажлын байр бий болгох анхан шатны санхүүжилтийг олгох, бизнес санааг нь сурталчлан таниулах, дэмжих зорилготой юм.
Тус уралдаанд хувиараа хөдөлмөр эрхлэгч, ажил хайгч, шинэлэг санаа бүхий гарааны бизнесээ эхэлж байгаа хөгжлийн бэрхшээлтэй иргэн хамрагдах боломжтой.
Уралдааныг зохион байгуулахад Ховд аймгийн ЗДТГ, Хөдөлмөр, халамжийн үйлчилгээний газар, Хөгжлийн бэрхшээлтэй хүний хөгжлийн төв хамтран ажиллаж буй.
Уралдааны бүртгэл 2025 оны зургаадугаар сарын 24-ний өдөр хүртэл үргэлжилнэ. Улмаар зургаадугаар сарын 25-нд оролцогчдод зориулсан сургалт, үйл ажиллагаа зохион байгуулж, шилдэг гарааны бизнес төслийг шалгаруулах юм. Уралдааны талаарх дэлгэрэнгүй мэдээллийг 77431220, 94058805, 95432727 утсаар лавлах боломжтой.
Хөгжлийн бэрхшээлтэй иргэдэд зориулсан гарааны бизнесийг дэмжих “Start up” уралдааныг Ховдод анх удаа зохион байгуулж байгаа ба шилдэг хоёр оролцогчид тус бүр 10 сая төгрөгийн санхүүжилт олгохоор төлөвлөжээ.
