Хүнсний бүтээгдэхүүний салбар нь эдийн засагт ихээхэн нөлөөлдөг салбар гэж хэлж болно. Учир нь бид ухаалаг гар утас, пуужин, цахим сүлжээ гэх мэт зүйлсээс татгалзаж чадах ч хүнснээс татгалзах боломжгүй. Сүүлийн үед дэлхийн ард түмэн эрүүл зөв хооллолтыг дэмжих болсон бөгөөд үйлдвэрлэгч байгууллагууд өөрийн ашиг орлогыг нэмэгдүүлэхийн тулд төрөл бүрийн бүтээгдэхүүн үйлдвэрлэх болсон ч чанарын шаардлага төдийлөн хангахгүй мэт санагдана. Үйлдвэрлэгч байгууллагууд ч бараа бүтээгдэхүүнээ худалдаалахын тулд хэрэглэгчдийн эрэлт хэрэгцээ дээр үндэслэж бүтээгдэхүүнийхээ сурталчилгааг гаргах нь бий. Ингээд иргэдийг төөрөгдөлд оруулдаг хүнсний бүтээгдэхүүнтэй танилцацгаая.

1. Тослоггүй бүтээгдэхүүн элсэн чихрээс хамааралтай болоход нөлөөлдөг

Сүүлийн үед дэлхий даяар эрүүл хооллолтыг дэмжих болсон учир ихэнхдээ тослоггүй бүтээгдэхүүн хэрэглэхийг зөвлөж байгаа билээ. Учир нь тослог агуулсан бүхий л бүтээгдэхүүн жин нэмэхэд нөлөөлдөг гэж тэд үздэг. Гэтэл огт тослоггүй бүтээгдэхүүн хэрэглэх нь эрүүл мэндэд тийм ч сайнаар нөлөөлдөггүй бөгөөд эрч хүчээр цэнэглэх, бие организмыг нөхөн төлжихөд саад учруулдаг байна. Аливаа нэгэн бүтээгдэхүүний тослогийг багасгахын тулд элсэн чихэр нэмэх магадлалтай байдаг бөгөөд тослоггүй бүтээгдэхүүн хэрэглэснээр бие организм эрч хүчээ зөвхөн тухайн бүтээгдэхүүний нүүрс уснаас авдаг аж. Элсэн чихэр нь маш амархан энергийн эх үүсвэр болж чаддаг учир тархи элсэн чихрээс энергиэ авах горимд шилжсэнээр илүү их чихэрлэг зүйл идэх хүслийг төрүүлдэг байна. Энэ нь чихрийн шижин болон бусад чихрийн хэт их хэрэглээтэй холбоотой өвчлөл үүсэхэд хүргэдэг.

2. Генийн өөрчлөлтгүй буюу “GMO FREE” гэх тэмдэг нь хэрэглэгчдийг төөрөгдөлд оруулдаг

Хүнсний бүтээгдэхүүн үйлдвэрлэгч байгууллагууд нь хэрэглэгчдийн эрэлт хэрэгцээ дээр дүгнэлт хийж бүтээгдэхүүнийхээ сурталчилгааг хийдэг билээ. Үүнд “GMO FREE” буюу “генийн өөрчлөлтгүй” гэх тэмдэглэгээтэй бүтээгдэхүүн багагүй харагддаг. Тэгвэл генийн өөрчлөлтгүй бүтээгдэхүүн огт байдаггүй бөгөөд үйлдвэрлэл эрхлэгчид энэхүү аргын ачаар үр тариа, жимс, хүнсний ногооны ургацыг нэмэгдүүлдэг. Үүнээс гадна уг аргын тусламжтайгаар сүүний гарцыг хүртэл нэмэгдүүлэх боломжтой байдаг гэнэ. Ийнхүү иргэд генийн өөрчлөлтгүй гэх тэмдэглэлд хууртаж үнэтэй бараа бүтээгдэхүүн худалдан авч, худалдаа эрхлэгчдийн орлогыг нэмэгдүүлж, өөрөө санхүүгийн хувьд алдагдалд ордог байна.

3. Нүүрс ус багатай хоолны дэглэм нь бие организмыг амин дэмийн дутагдалд оруулдаг

Эрүүл хооллолтын ачаар жингээ хасахыг хүссэн хүмүүст ихэнхдээ нүүрс усаа хасах хэрэгтэй гэж зөвлөдөг. Гэвч нүүрс ус болон тослоггүй бүтээгдэхүүнийг хүнсний хэрэглээнээсээ ор тас хасах нь эрүүл мэндэд сөргөөр нөлөөлөх магадлалтай. Учир нь бие организм их хэмжээний уургийг боловсруулахын тулд багагүй ачаалал авах шаардлагатай тулгарна. Энэ нь мэдээж, хоол боловсруулах эрхтэнд асуудал үүсгэнэ. Үүнээс гадна таныг эрч хүчээр хангахын тулд тархи нь биеийн илүүдэл өөхнөөс бус харин масснаас зарцуулж эхэлснээр таны бие өөх бус харин массаа алдах болно. Мөн нүүрс усны дутагдалд орсноор ядрах, стресстэх шинж тэмдэг ч илэрнэ.

4. Тодорхой нэг бүтээгдэхүүнийг хэт их сурталчилах нь тухайн орны эдийн засагт сөргөөр нөлөөлдөг

Тодорхой нэгэн бүтээгдэхүүний хэрэглээг илүү ихээр сурталчлах нь зарим орны эдийн засагт сөргөөр нөлөөлдөг. Жишээлбэл: саяхнаас киноа будааны ашиг тусын талаар дэлхий даяар тархсанаар энэхүү будааны эрэлт маш ихээр нэмэгдсэн. Өмнө нь зөвхөн өмнөд америкийн уугуул иргэд хэрэглэж байсан бол 21-р зууны 20 оноос эхэлж, баруунд тархаж эхэлсэн байна. Ийнхүү киноа будааны эрэлт хэрэгцээ ихэссэнээр тариалагч орон болох Боливийн тариаланчид өөрийн тариалангийн талбайд тариалж байсан бүх төрлийн буудай, жимс, хүнсний ногоогоо тариалахаа больж ихэнх хэсэгт киноа будааг тарьснаар наад захын өдөр тутмын энгийн хэрэглээний хүнсний бүтээгдэхүүний үнэ нэмэгдэж эхэлсэн байна. Ингээд ард иргэд хямд үнэтэй гурил, гурилан бүтээгдэхүүн, хийжүүлсэн ундаа гэх мэт зүйлсийг хэрэглэж, таргалалтад өртөх болжээ.

5. Үхэр ихээр өсгөж үржүүлэх нь агаарын бохирдолд нөлөөлнө

Дэлхий дээр 1,5 тэрбум орчим үхэр бий. Энэхүү тоо нь сүүний хэрэглээ болон махны хэрэглээ ихэссэнтэй холбоотойгоор жил бүр нэмэгдэж байгаа. Их хэмжээний үхэр тэжээх нь байгаль орчинд сөргөөр нөлөөлдөг. Учир нь үхрийн ялгадаснаас метан гэх хий ялгардаг бөгөөд энэ нь байгаль орчинд сөрөг үр дагавартай. Тиймээс үхрийн тэжээлд анхаарал хандуулах хэрэгтэй гэж зөвөлж байгаа ч хүн төрөлхтөн эхний ээлжид өөрийн ашигт анхаарал хандуулж байгаа бололтой.

эх сурвалж: саак.мн