Бүгд Найрамдах Узбекистан Улсын Ерөнхийлөгчийн Монгол Улсад хийж буй төрийн айлчлалын хүрээнд, Монголын Үндэсний Худалдаа, Аж Үйлдвэрийн Танхим болон Узбекистан Улсын Худалдаа, Аж Үйлдвэрийн Танхим хамтран “Монгол–Узбекистаны бизнес форум”-ыг МҮХАҮТ зохион байгууллаа.

Бизнес уулзалтыг нээж Монгол Улсын Их Хурлын гишүүн бөгөөд Шадар сайд С.Амарсайхан, Узбекистан Улсын Худалдаа, аж үйлдвэр, хөрөнгө оруулалтын сайд И.Кудратов, Монголын Үндэсний Худалдаа Аж Үйлдвэрийн Танхимын Ерөнхийлөгч бөгөөд Удирдах зөвлөлийн дарга Б.Лхагважав, Узбекистаны Худалдаа аж үйлдвэрийн танхимын Тэргүүлэгч Д.Вахабов нар үг хэллээ.

Мөн Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Монгол Улсын Ерөнхийлөгчийн Эдийн засгийн бодлогын зөвлөх Б.Даваадалай нар оролцлоо.

Хоёр орны бизнес эрхлэгчид, хөдөө аж ахуй, ялангуяа мах, махан бүтээгдэхүүн, сүү, сүүн бүтээгдэхүүн, хүнсний ногооны экспорт, импорт, ноос, ноолуур, оёмол бүтээгдэхүүн, эрчим хүч, дэд бүтэц, санхүү, хөрөнгө оруулалт, тээвэр, логистик салбаруудад хамтран ажиллах өргөн боломж бий гэдгийг хэллээ.

Тус форумд хоёр талын төлөөллүүд, хүнс, хөдөө аж ахуй, уул уурхай, барилга, эрчим хүч, тээвэр логистик зэрэг 20 гаруй салбарын 250 орчим бизнес эрхлэгчид оролцсон юм.

Форум Монгол болон Узбекистаны эдийн засгийн гол салбарууд болох худалдаа, эдийн засгийн хамтын ажиллагааны төлөв илтгэлүүдээр үргэлжиллээ. Үүнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хувьсгал” үндэсний хөдөлгөөний хүрээнд хийгдсэн ажлуудын үр дүн, хэрэгжилт, цаашид хүнс, хөдөө аж ахуйн салбарт хамтран ажиллах боломжуудын талаар илтгэл танилцууллаа.

Мөн Монгол Улсын Ерөнхийлөгчийн 2024 онд Узбекистан улсад хийсэн төрийн айлчлалаар “Мал аж ахуй, мал эмнэлгийн салбарт хамтарч ажиллах тухай Монгол Улсын Хүнс, хөдөө аж ахуй хөнгөн үйлдвэрийн яам, Узбекистан Улсын Хөдөө аж ахуйн яам хоорондын хэлэлцээр”-т гарын үсэг зурж байсан. Тус хэлэлцээрийн хүрээнд хоёр улсын мал эмнэлэг, мал аж ахуйн салбарт мал эмнэлэгтэй холбоотой мэдлэг, туршлага солилцох мал, амьтны халдварт өвчнөөс урьдчилан сэргийлэх, тандалт хийх, хяналт тавих чиглэлээр хамтран ажиллахаар болсон юм.

Өнөөдөр эдгээр шийдвэр бодит ажил болон хэрэгжиж, “Узбекистаны худалдааны төв” Улаанбаатар хотноо нээгдэж, хоёр орны бизнес эрхлэгчдийн шууд харилцааг дэмжих боломжтой бодит платформ болон хөгжүүлж байна.

• Шинээр батлагдсан Ташкент–Бишкек–Өрөмч–Улаанбаатар авто коридор логистикийн зардлыг бууруулж, хугацааг богиносгож, экспорт, импортын урсгалыг эрс нэмэгдүүлэх чухал суурь болж байна. Улаанбаатар–Ташкентын шууд нислэг 2025 оны хоёрдугаар хагаст эхлэхээр төлөвлөгдөж байгаа нь аялал жуулчлал, соёл, боловсролын салбарын солилцоог эрчимжүүлнэ.
• Хөдөө аж ахуй, хүнсний үйлдвэрлэлийн салбарт Монгол Улсаас мах, махан бүтээгдэхүүн, амьд мал экспортлох, Узбекистанаас жимс, жимсгэнэ, хүнсний ногоо импортлох үйл ажиллагаа илүү оновчтой, шууд чиглэлд шилжих боломж бүрдэж байна.
• Узбекистан улс бол манай үндэсний үйлдвэрлэгчдэд зориулсан Төв Азийн зах зээлд нэвтрэх стратегийн гарц. Харин Монгол Улс ч тус улсын хувьд Зүүн Азийн чиглэлд хүрэх дэд бүтцийн хамтын түнш юм.

Уулзалтад оролцогч талууд дараах салбаруудад хамтран ажиллах өргөн боломжтой гэдгийг тэмдэглэв. Үүнд:

• Хөдөө аж ахуй (мах, махан болон сүү, сүүн бүтээгдэхүүн)

• Хүнсний ногооны экспорт, импорт

• Ноос, ноолуур, оёмол бүтээгдэхүүн

• Эрчим хүч, дэд бүтэц

• Санхүү, хөрөнгө оруулалт

• Тээвэр, логистикийн салбарууд багтаж байна.