Монгол Улсын Хүнс, хөдөө аж ахуй, хөнгөн үйлдвэр (ХХААХҮ)-ийн сайд Ж.Энхбаяр Бүгд Найрамдах Узбекистан Улс (БНУзбУ)-ын Хүнс, хөдөө аж ахуйн сайд Абдурахмонов Иброхим Юлчиевич тэргүүтэй төлөөлөгчдийг 2025.06.23-ны өдөр хүлээн авч уулзлаа.
Уулзалтын эхэнд ХХААХҮ-ийн сайд Ж.Энхбаяр сүүлийн жилүүдэд Монгол, Узбекистаны хамтын ажиллагаа өргөжин тэлж, хоёр орны хооронд өндөр түвшний айлчлалууд эрчимжиж эхэлж байгаа. Тухайлбал, Монгол Улсын Ерөнхийлөгч У.Хүрэлсүх 2024.06.24-27-ны өдрүүдэд Бүгд Найрамдах Узбекистан Улсад төрийн айлчлал хийсэн. Тухайн айлчлалаар Монгол Улсын Хүнс, хөдөө аж ахуй, хөнгөн үйлдвэрийн яам болон Бүгд Найрамдах Узбекстан Улсын Хөдөө аж ахуйн яам хооронд “Хөдөө аж ахуйн чиглэлээр хамтран ажиллах тухай гэрээ” болон “Мал эмнэлэг, мал аж ахуйн чиглэлээр хамтран ажиллах тухай гэрээ”-г тус тус байгуулсныг онцлон тэмдэглэсэн юм.
Хамгийн сүүлд 2025.06.16-ны өдөр Монгол Улсын ХХААХҮЯ болон БНУзбУ-ын Хүнс, хөдөө аж ахуйн яам хоорондын хамтын ажиллагааны төлөвлөгөөгөө эцэслэн баталсан юм. Хоёр орны салбарын хамтын ажиллагаа ийнхүү шинэ шатанд гараад байгаа бөгөөд хөдөө аж ахуйн бүтээгдэхүүний худалдааг хөнгөвчлөх нэн шаарлага байгааг ХХААХҮ-ийн сайд Ж.Энхбаяр тодотголоо.
Мөн БНУзбУ-ын хөдөө аж ахуй, ялангуяа газар тариалангийн салбарын мэргэжилтнүүдийг Монгол Улсад авчран судалгаа шинжилгээ хийх, цаашдаа хамтран хэрэгжүүлэх төсөл хөтөлбөрөө шинжлэх ухааны үндэслэлтэй эцэслэн тохирцож батлах саналыг тавилаа. Шаардлагатай тохиолдолд БНУзбУ-ын мэргэжилтнүүдийг дэлхийн түвшинд гараад буй Монголын ноос, ноолуур боловсруулах үйлдвэрүүдэд дадлагажуулан сургах боломжтойг хэллээ.
БНУзбУ-ын Хүнс, хөдөө аж ахуйн сайд Абдурахмонов Иброхим Юлчиевичийг зүгээс Монгол Улстай хамтын ажиллагаа өргөжүүлэх бүхий л алхмыг дэмжин ажиллахаа мэдэгдсэн юм.
Монгол Улсаас БНУзбУ руу хийх амьд мал, мах, махан бүтээгдэхүүний экспорт эрчимтэй өсөж байгаа энэ үед хоёр тал хорио цээр, тээвэр, тарифын нөхцөлөө зөөлрүүлэхэд санал нэгдсэн юм.
Хоёр улсын Ерөнхийлөгч нарын хооронд худалдааны эргэлтийг 100 сая ам.долларт хүргэхээр тохиролцсон бөгөөд энэ зорилтыг биелүүлэхэд хөдөө аж ахуй хамгийн боломжит салбар болохыг танилцуулсан. Харилцан худалдааны хэмжээг нэмэгдүүлэх, нэр төрлийг төрөлжүүлэх, зорилгоор харилцан нийлүүлэх барааны жагсаалт гаргахад хамтран ажиллахаар тогтов.