Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр хөдөө аж ахуйн уламжлалт бизнест инновац шингээн, шийдлээр түүчээлж буй “Грийн Групп”-ийн гоймонгийн үйлдвэрийн үйл ажиллагаатай танилцлаа.
Үндэсний брэнд бүтээгч “Грийн Групп” нь үйлдвэрлэл, худалдаа, технологи, санхүүгийн чиглэлийн 13 салбар компани, ACTIV GARDEN төслийн хүрээнд үйл ажиллагаа эрхэлж, Бизнесийн экосистемийн төгс хувилбарыг нэвтрүүлсэн, экспортод чиглэсэн үндэсний хэмжээний компани болон өргөжин тэллээ. Баталгаатай, чанартай, органик бүтээгдэхүүний эрэлт хэрэгцээ улам бүр өсөж буй дэлхийн зах зээлд үндэсний үйлдвэрлэгчид нэгдэн гарч, Талын Монгол брэндээр олон улсад Монголоо төлөөлөх санаачлагыг “Грийн Групп” эхлүүлж байгаа юм. Мөн олон улсын стандарт хангасан үйлдвэрлэлийн байранд, дэлхийн хүнсний салбарт мөрдөгддөг НАССР, GMP, ISO тэргүүтэй стандарт, шаардлагуудыг ханган бүтээгдэхүүн үйлдвэрлэж, инновац шингээн хэрэглэгчдэд хүргэж буй.
“Грийн групп” нь “Хүнсний хувьсгал” үндэсний хөдөлгөөний хүрээнд олгогддог бага хүүтэй, урт хугацаатай зээлд хамрагдан Талын Монгол брэндийн томоохон үйлдвэрийг босгожээ.
Монголын хүнсний бүтээгдэхүүн үйлдвэрлэлийг ахисан түвшинд гаргаж буй “Грийн групп” өдгөө дэлхий даяар 150 гаруй компанитай хамтын ажиллагаа хөгжүүлж, олон улсын хүнсний бүтээгдэхүүн үйлдвэрлэлийн салбарт шинээр нэвтэрсэн сайн технологийг дотоодын хэрэгцээ, онцлогт нийцүүлэн нэвтрүүлдэг юм.
ЛАПША-1 үйлдвэр
Лапша-1 нь хоногт 35 тонн гоймон үйлдвэрлэх хүчин чадалтай бүрэн автомат үйлдвэр юм. Лапша брэндийн гоймон нь 2012 оноос хойш дотоодын зах зээлийн 77 хувийг дангаар эзэлж байна. Тус үйлдвэр нь хүчин чадлаа нэмэгдүүлж, нэр төрлөө олшруулан Лапша, Талын монгол брэндийн 50 орчим төрлийн гоймонг дотоодын зах зээлд нийлүүлж байна.
Бид уул уурхайн бус, нөхөн сэргээгдэх арвин баялгаа экспортод гаргаж, гадны зах зээлд экологийн цэвэр бүдээгдэхүүнээрээ танигдахыг эрмэлзэж буй. Тус зорилгыг эрхэмлэн “Грийн групп” гадаад зах зээл төдийгүй дотоодын хэрэглэгчдийг чанартай бүтээгдэхүүнээр тогтвортой хангахаах үндэсний брэнд бүтээх үлгэр жишээ шийдлийг гаргасан юм.
