Монгол Улсын Ерөнхийлөгч Ухнаагийн Хүрэлсүх Бүгд Найрамдах Киргиз Улсад төрийн айлчлал хийж байна.

Айлчлалын хүрээнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Ерөнхийлөгчийн Төсөл хөтөлбөрийн зохицуулалт, иргэний нийгмийн бодлогын зөвлөх Б.Жавхлан, МҮХАҮТ-ын Ерөнхийлөгч Б.Лхагважав нараар ахлуулсан 50 гаруй бизнес эрхлэгчдийн төлөөлөл Бүгд Найрамдах Киргиз Улсын Өндөр Технологийн Паркийн үйл ажиллагаатай танилцлаа.

Бүгд Найрамдах Киргиз Улсын Өндөр Технологийн Парк (High Technology Park – HTP) нь бүс нутгийн болон дэлхийн хэмжээнд IT, дижитал технологийн инновацийг хөгжүүлэх, гадаад болон дотоодын хөрөнгө оруулалтыг татах, залуу стартапуудыг дэмжих зорилгоор байгуулагдсан бөгөөд одоогийн байдлаар 10 гаруй жил амжилттай үйл ажиллагаа явуулж байгаа юм. 10,000 м² талбайг хамарсан орчин үеийн байгууламжтай. Энэ нь ажлын байр, конферецийн танхим, лабораториуд, үйлдвэрлэлийн талбай зэрэг олон төрлийн үйл ажиллагаа явуулах боломжийг олгодог байна.

Тус компанийн орлого нь 2013 онд 3 сая доллар байсан бол 2020 онд 15 сая долларт хүрчээ. Экспортын зах зээлд амжилттай нэвтэрч, бүтээгдэхүүн нь АНУ, Казахстан, ОХУ, Их Британи, Япон зэрэг 30 оронд экспортлогдож байна. Хятад, Шанхай, Казахстан зэрэг улс орнуудтай технологийн салбарт хамтран ажиллаж байна. Энэ нь олон улсын зах зээлд нэвтрэх, Киргизийн технологийн салбарыг дэлхийд танигдах боломжийг бий болгодог юм.

Мөн хамтрагч компани, хувь хүмүүст зориулсан татварын тусгай дэглэм бүхий таатай орчныг бүрдүүлсэн байна.

Үүнд:

• Нэмэгдсэн өртгийн албан татвар (НӨАТ) – 0%
• Орлогын албан татвар – 0%
• Хувь хүний орлогын албан татвар – 5% (ердийн 10%-ийн оронд)
• Нийгмийн даатгалын шимтгэл – буурсан хувьтайгаар тооцогдоно
• Орлогын 1%-ийг ӨТП-ийн хөгжлийн санд төвлөрүүлдэг ажээ.

Өнөөдрийн байдлаар 380 гаруй компани, 2500 гаруй ажилтан Өндөр Технологийн Паркийн хүрээнд ажиллаж байна. Ингэхдээ төр–хувийн хэвшлийн түншлэл, олон улсын байгууллагуудтай хамтын ажиллагаагаа тэлж, шинэлэг бизнесийг төрүүлэх, тогтвортой өсөлтийг хангах замаар Киргиз Улсын технологийн салбарын тэргүүлэгч тоглогчдын нэг байж, амжилттай үйл ажиллагаагаа явуулж байна.

Тус чиглэл дэх хоёр улсын хамтын ажиллагааны боломж:

Өндөр технологийн хөгжилд хамтран ажиллахад хамгийн чухал нь сургалт, мэргэжилтнүүдийн солилцоо юм.

• Судалгаа ба сургалтын хөтөлбөрүүд: Монгол болон Киргизийн их, дээд сургуулиуд хамтран технологийн шинэчлэлийн чиглэлээр сургалтын хөтөлбөрүүдийг зохион байгуулж, оюутнуудаа бэлтгэх,
• Шинжлэх ухаан, технологийн тэргүүлэх мэргэжилтнүүдийн хамтын ажиллагаа: Киргизстан болон Монголын эрдэмтэн, судлаачид, мэргэжилтнүүдтэй хамтран ажиллах нь хоёр улсын мэдлэг, туршлагыг нэмэгдүүлэхэд чухал ач холбогдолтой,
• Киргизстан, Монгол хоёр улс орчин үеийн технологиудад хөрөнгө оруулалт хийх боломжийг нэмэгдүүлж, дотоодын болон гадаадын хөрөнгө оруулагчдыг татах тал дээр хамтран ажиллах,
• Хоёр улс ногоон технологи, тогтвортой хөгжлийн салбар дахь хамтын ажиллагааг өргөжүүлэх боломжтой.