“Хүнсний хувьсгал” цуврал нэвтрүүлэг, мэдээ, сурвалжилга, сошиал контентыг тогтмол бэлтгэж, хэвлэл мэдээллийн хэрэгслүүдээр түгээн ажилласан Найруулагч, зураглаач Ш.Баасанжавыг Монгол Улсын Ерөнхийлөгчийн зарлигаар “Алтан гадас” одонгоор шагналаа.

Шагналыг Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр гардуулсан юм.

Монгол Улсын Ерөнхийлөгч У.Хүрэлсүхийн санаачилсан “Хүнсний хувьсгал” үндэсний хөдөлгөөний хүрээнд батлагдсан Хүнсний хангамж, аюулгүй байдлыг хангах талаар авах зарим арга хэмжээний тухай УИХ-ын 36 дугаар тогтоолын /К/ заалтад тусгагдсан ажлыг “Хүнсний хувьсгал” ТББ-ын хэвлэлийн баг хэрэгжүүлэн ажиллаж байна. Энэ хугацаанд “Хүнсний хувьсгал” цуврал нэврүүлгийн 135 гаруй дугаар, “Хүнсний хувьсгал” цуврал сэтгүүлийн таван дугаар, “Хүнсний хувьсгал” хөдөлгөөнтэй холбоотой мэдээ, сурвалжилга, сошиал контентыг тогтмол бэлтгэж, хэвлэл мэдээллийн хэрэгслүүдээр түгээн ажиллажээ.

Ш.Баасанжав нь улсад 16 жил зураглаач, найруулагч, дижитал технелоги болон хиймэл оюун ухааны салбарт эзэмшсэн мэргэжлээрээ тууштай ажиллаж байна.

Ингэхдээ 21 аймгийг хоёр бүтэн тойрч “Баялаг бүтээгч” цуврал 60 гаруй дугаарыг бэлтгэн цар тахлын хүнд хэцүү үед ч малчид, ЖДҮҮ салбарын баялаг бүтээгчид болон үндэсний үйлдвэрлэгчдээ олон нийтэд сурталчлан таниулах үйлсэд үнэтэй хувь нэмрээ оруулж ирсэн билээ.

Мөн “Тэрбум мод” үндэсний хөдөлгөөний хүрээнд нийслэл болон, 12 аймагт ажиллан 18 цуврал нэвтрүүлгийг олон нийтийн хүртээл болгосон.

• УИХ-ын 36-р тогтоолын /К/ заалт: Монгол Улсад үйлдвэрлэсэн брэнд бүтээгдэхүүнийг олон улсын болон бүс нутгийн хэмжээний үзэсгэлэн худалдаанд танилцуулах, сурталчлах боломжийг бүрдүүлж, экспортлох эрх зүйн орчныг бүрдүүлэх, дэмжлэг үзүүлэх;