Монгол Улсын Ерөнхийлөгч Ухнаагийн Хүрэлсүх Бүгд Найрамдах Тажикистан Улсын Ерөнхийлөгч Эмомали Рахмоны урилгаар тус улсад төрийн айлчлал хийж байна.
Айлчлалын хүрээнд “Тажик-Монголын Бизнес форум” зохиогдож, Монгол Улсын Шадар Сайд С.Амарсайхан, Бүгд Найрамдах Тажикистан Улсын Тэргүүн Шадар Сайд Хоким Холикзода нар нээж үг хэллээ.
Мөн Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Ерөнхийлөгчийн Төсөл хөтөлбөрийн зохицуулалт, иргэний нийгмийн бодлогын зөвлөх Б.Жавхлан нар “Хүнсний хувьсгал” болон “Цагаан алт” үндэсний хөдөлгөөний үйл ажиллагааны талаар илтгэл танилцуулав.
Тажикистан улс нь дотоодын түүхий эд, нөөц боломжоо ашиглан усан цахилгаан станцаар дотоодын эрчим хүчнийхээ үйлдвэрлэлийн дийлэн хувийг бүрдүүлж байгаагаараа онцлог улс. Мөн тус улсын хөдөө аж ахуйн салбар нь эдийн засгийн тулгуур болж эрчимтэй өсч байгаа юм. Тажикистан Улсын эдийн засаг нь төрийн өмчит аж ахуйн нэгжид голчлон түшиглэдэг бөгөөд бүртгэлтэй 1000 орчим төрийн өмчит аж ахуйн нэгжээс 600 гаруй аж ахуйн нэгжийн дийлэнх хувьцааг тус улсын Засгийн газар эзэмшиж байна. Тус улсын уул уурхай, эрчим хүч, харилцаа холбоо зэрэг чухал салбарууд төрийн мэдэлд байгаа бөгөөд хамгийн том 10 төрийн өмчит компани нь төрийн өмчит аж ахуйн нэгжүүдийн нийт хөрөнгийн 97%-ийг эзэлж байна.
Мөн даавуу, хувцас үйлдвэрлэлийн салбар өргөжин, дотоодын хэрэглээ болон экспортын бүтээгдэхүүний төрөл нэмэгджээ.
Бизнес форумын үеэр хоёр талын Худалдаа Аж Үйлдвэрийн танхим болон бизнес эрхлэгчид Санамж бичиг байгуулан гарын үсэг зурж, хамтын ажиллагааг эхлүүллээ.
Форумыг хааж МҮХАҮТ-ын Ерөнхийлөгч Б.Лхагважав, Бүгд Найрамдах Тажикистан Улсын ХАҮТ-ын Дэд Ерөнхийлөгч Хайдар Раджабзода нар үг хэлэн, бизнес эрхлэгчдэд амжилт хүслээ.
Форумд хоёр улсын 150 гаруй бизнес эрхлэгчид оролцож “B2B” уузалтаар хүнс, хөдөө аж ахуй болон бусад салбарын туршлага, нөөц, бололцоог харгалзан харилцан ашигтай хамтын ажиллагааг хөгжүүлэх эрмэлзлээ илэрхийлж, цаашдын үйл ажиллагааны эхлэлийг тавьлаа.
