Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Тажикистан Улсад хийж буй төрийн айлчлалын Бизнес зочдын багт 50 гаруй бизнес эрхлэгчдийн төлөөлөл оролцож байна.
Айлчлалын хүрээнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Ерөнхийлөгчийн Төсөл хөтөлбөрийн зохицуулалт, иргэний нийгмийн бодлогын зөвлөх Б.Жавхлан, МҮХАҮТ-ын Ерөнхийлөгч Б.Лхагважав болон бизнес эрхлэгчдийн төлөөллүүд Бүгд Найрамдах Тажикистан Улсын “Мармари” мах, махан бүтээгдэхүүн боловсруулах үйлдвэрийн үйл ажиллагаатай танилцлаа.
2021–2025 онуудад Тажикистан Улсын үйлдвэрлэлийн салбар 20–23.4% -ийн өсөлттэй байна. Үүнд “Мармари” үйлдвэр тэргүүлэх жишээ болж байгаа юм. “Мармари” компани (LLC Marmari) нь Тажикистаны хэмжээнд мах болон махан бүтээгдэхүүний иж бүрэн үйлдвэрлэлийн цогцолбор бөгөөд 2021 онд байгуулагдсан улсдаа тэргүүлэх чиглэлийн үйлдвэр юм.
Тус үйлдвэр нь тэжээлийн үйлдвэр, мах, махан болон тосон бүтээгдэхүүний иж бүрэн кластер бий болгосон орчин үеийн тоног төхөөрөмж бүхий байгууламж юм.
“Мармари” нь:
- Мал аж ахуй,
- Мах боловсруулах цех,
- Шувууны аж ахуй,
- Ургамлын тосны үйлдвэр гэсэн дөрвөн үндсэн хэсэгтэй.
Тажикистанын махны хэрэглээний 99.9 %-ийг бүрэн хангадаг. 16 га талбайд жилд 5 сая өндөг боловсруулж, өдөртөө 3000-10,000 ширхэг тахианы мах бэлтгэх хүчийн чадал бүхий үйлдвэрийн байртай багаад 800 га хөдөө аж ахуйн талбайд тэжээл тариалдаг байна.
