Бүгд Найрамдах Тажикистан Улс дахь айлчлалын хүрээнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Ерөнхийлөгчийн Төсөл хөтөлбөрийн зохицуулалт, иргэний нийгмийн бодлогын зөвлөх Б.Жавхлан, МҮХАҮТ-ын Ерөнхийлөгч Б.Лхагважав болон бизнес эрхлэгчдийн төлөөллүүд Бүгд Найрамдах Тажикистан Улсын “Сиёма” (Siyoma Water) шингэн хүнсний үйлдвэрийн үйл ажиллагаатай танилцлаа.
Тажикистаны ус, ундааны салбарт шинэ төрх бий болгосон тус үйлдвэр 2019 онд албан ёсоор нээлтээ хийсэн бөгөөд хувийн хөрөнгө оруулалтаар байгуулагдсан “Avesto Group”–ийн охин компани.
Сиёма уулсаас цэвэрлэсэн мөсний усыг дэвшилтэт технологиор савлах, дотоод зах зээлд нийлүүлэх, томоохон экспортын төслүүдийг эхлүүлэх чиглэлээр амжилттай ажиллаж буй Тажикистаны ус ундааны үйлдвэрлэлийн тэргүүлэгч бизнесийн нэг юм. Жилд 33 сая литр ундаа, ундны болон газтай усыг үйлдвэрлэдэг
Сав, баглаа боодлын плёнк, лааз зэрэгтээ бүс нутгийн хамтын ажиллагааг ашигладаг нь өртөг бууруулах, ложистикийн эрсдэл хуваах алхам болдог байна. “Сиёма” нь дотоодын шингэн бүтээгдэхүүний зах зээлийг хангаад зогсохгүй, импорт орлуулах чадвартай урт хугацааны стратегитэй үйлдвэр юм. Мөн Хятад, Катар, ОХУ, Казахстан, Узбекистан зэрэг улсууд руу бүтээгдэхүүнээ экспортолдог байна.
