Монгол Улсын Ерөнхийлөгч Ухнаагийн Хүрэлсүхийн ивээл дор, Гадаад харилцааны сайдын санаачилгаар зохион байгуулагдаж буй “Дэлхийн бизнес эрхлэгч эмэгтэйчүүдийн чуулга уулзалт” эхэлж байна.
Монгол Улс эмэгтэйчүүдийн нийгэм, улс төрийн манлайлал, үүрэг оролцоог бүх түвшинд нэмэгдүүлэх зорилгоор сүүлийн жилүүдэд олон улсын чуулга уулзалтуудыг өөрийн эх орондоо тогтмол зохион байгуулж байна.
Чуулга уулзалтыг нээж Монгол Улсын Ерөнхийлөгч Ухнаагийн Хүрэлсүх, Гадаад Харилцааны сайд Б.Батцэцэг нар үг хэллээ.
“Урам зориг өгөх-нөлөөлөл үзүүлэх, хөрөнгө оруулах” уриатай энэхүү чуулга уулзалт нь манай улсын хувьд эмэгтэйчүүдийг дэмжсэн дөрөв дэх удаагийн томоохон үйл ажиллагаа бөгөөд 25 улсын 230 гаруй зочин төлөөлөгч оролцож байна. Энэ үеэр жендерт суурилсан эдийн засаг-бизнесийн бодлого, хүний нөөц, хөрөнгө оруулалт, бизнесийн зах зээлд өрсөлдөх чадварыг нэмэх зорилготой сургалт, семинарууд болох юм.
Мөн бизнес эрхлэгч эмэгтэйчүүдэд тулгардаг нийтлэг сорилтыг сонсож, хамтран шийдэхийг зорьж буй. Түүнчлэн бодлогын түвшинд жендерт суурилсан эдийн засгийг дэмжих, хамтын ажиллагааг бэхжүүлэх, хил дамнасан түншлэл, хөрөнгө оруулалтын шинэ гарцуудыг нээх бололцоотой гэж үзэж байна.
Эмэгтэйчүүдийн эдийн засгийн оролцоог нэмэгдүүлэх нь зөвхөн бизнесийн хөгжил бус, улс орны тогтвортой хөгжил, ирээдүйн баталгаа юм.
Энэхүү чуулга уулзалт нь:
- Хамтын ажиллагааны шинэ гүүр
- Мэдлэг, туршлага солилцох талбар
- Хөрөнгө оруулалтын шинэ боломж
- Хүйсийн тэгш байдлыг бодитоор дэмжих алхам болох юм.
Монгол Улсын Ерөнхийлөгч Ухнаагийн Хүрэлсүхийн ивээл дор зохион байгуулагдаж байгаа “Дэлхийн бизнес эрхлэгч эмэгтэйчүүдийн чуулга уулзалт”-ын хүрээнд “Олон улсын бизнес эрхлэгч эмэгтэйчүүдийн бараа бүтээгдэхүүний үзэсгэлэн худалдаа” яг одоо Сүхбаатарын талбайд болж байна.
Үзэсгэлэн худалдаанд нийслэлийн 9 дүүргийн 125 гаруй эмэгтэй жижиг, дунд үйлдвэрлэл эрхлэгч бүсгүйчүүд бүтээгдэхүүнээ дэлгэлээ.
