Дорноговь аймгийн Ус цаг уур, орчны шинжилгээний төвөөс нийт нутгийн бэлчээрийн даацын судалгааг гаргажээ.

Бэлчээрийн даацыг тооцоолж гаргасан дүнгээс үзвэл аймгийн нийт нутгийн 40 хувьд зуншлага сайн, 36 хувьд нь зуншлага хэвийн, 24 хувьд гандуу байна. Газар нутгийн 47.1 хувь нь бэлчээрийн нөөцтэй, 33.0 хувь нь бэлчээр хүрэлцээтэй, 18.9 хувь нь даац 1-3 дахин хэтэрсэн, 0.9 хувь нь даац 3-5 дахин хэтэрсэн, 0.1 хувь нь даац олон дахин хэтэрсэн байгаа юм.

Аймгийн хувьд өвөл, хаврын бэлчээрийн даац нутгийн 80.1 орчим хувьд хүрэлцээтэй, 19.9 орчим хувьд хэтэрчээ. Харин өнгөрсөн жилийн бэлчээрийн даацын судалгаагаар нийт нутгийн 84 хувь нь бэлчээрийн нөөцтэй гэж дүгнэж байжээ.

Энэ жилийн бэлчээрийн төлөв байдлын ажиглалт судалгааг хийх явцад бэлчээрийн нийт ургамлын ногоон масс их байгаа боловч ургамлан нөмрөгийн дийлэнх хувийг шүлхий шарилж, нэг наст ургамлууд эзэлж байгааг албаны судалгаанд дурджээ.

Эдгээр ургамлыг мал төдийлөн сайн иддэггүй бөгөөд идэш тэжээлийн голлох ургамал болох хазаар, хялгана таана, хөмүүл зэрэг нарийн ногоо бага ургасан, тачир сийрэг байгаа нь бэлчээрийн даац багтаамж хэтэрч гарах үндсэн нөхцөл бүрдсэн гэж үзжээ.

Эх сурвалж: Монцамэ агентлаг