Засгийн газрын Хяналт хэрэгжүүлэх газраас Монгол улсын “Хүнсний хангамж, аюулгүй байдал”-ын чиглэлээр хэрэгжүүлсэн бодлогын үнэлгээг олон улсын аргачлалд нийцүүлэх зорилгоор ХБНГУ-ын Хөгжлийн үнэлгээний байгууллагатай хамтран “Бодлогын үнэлгээний төлөвлөгөө боловсруулах үе шат” сэдэвт сургалт-семинарыг зохион байгуулж байна. /2025.09.10-2025.09.11/

Энэхүү арга хэмжээнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяраар ахлуулсан Ерөнхийлөгчийн Тамгын газрын Хүнсний төсөл, хөтөлбөрийн албаны төлөөллүүд оролцлоо.

ЕТГ-ын Хүнсний төсөл, хөтөлбөрийн албаны даргын түр орлон гүйцэтгэгч О.Нямсүрэн “Хүнсний хангамж, аюулгүй байдал” үндэсний хөдөлгөөний талаар илтгэл таницуулан мэдээлэл, зөвлөмж өглөө.

“Хүнсний хангамж, аюулгүй байдал” үндэсний хөдөлгөөн нь үйл ажиллагааны үр дүндээ бодлогын үнэлгээ хийлгэж, шинэ тогтолцоо нэвтрүүлж буй анхдагч байгууллагуудын нэг болж, идэвхтэй хамтран ажилладаг юм.

Сургалт-семинар нь бодлого хэрэгжүүлэгч болон хяналт-шинжилгээ, үнэлгээ хариуцсан төрийн албан хаагчдад бодлогын үнэлгээний төлөвлөгөө боловсруулах чиглэлээр онолын болон практикийн мэдлэг олгож, бодлогын үнэлгээний төлөвлөгөөний төслийг боловсруулахад чухал ач холбогдолтой юм. Сургалтад ЕТГ, ХБНГУ-ын Хөгжлийн үнэлгээний институт, ХХААХҮЯ, ЗГХХГ, ЭМЯ-ны төлөөллүүд болон холбогдох албаныхан хамрагдаж байна.

Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд 2022 онд “Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 36 дугаар тогтоол батлагдсан.
Дээрх тогтоолыг төрийн болон төрийн бус байгууллагууд, их сургууль, эрдэм шинжилгээний хүрээлэн, хүнс хөдөө аж ахуйн салбарын баялаг бүтээгчид, иргэдийн оролцоотойгоор олон талт хамтын ажиллагаа, оролцоонд тулгуурлан хэрэгжүүлж байна.

Мөн Ерөнхийлөгчийн Тамгын газрын даргын 29 дүгээр захирамжаар байгуулагдсан Ажлын хэсгээс бодлогын хэрэгжилтийг үр дүнд суурилсан байдлаар чанарын баталгаажуулалт хийхэд онцгой анхаарч, Засгийн Газрын Хяналт хэрэгжүүлэх газартай хамтран ажиллаж ирсэн.

Өнгөрсөн хугацаанд Засгийн газрын Хяналт хэрэгжүүлэх газар, ХБНГУ-ын Хөгжлийн үнэлгээний байгууллага (DEval) болон Монголын үнэлгээний холбоо хамтран “Монгол Улсын хөгжлийн бодлогын үнэлгээний чадавхын индекс”-ийг тогтоох үнэлгээг амжилттай зохион байгуулж, үр дүнг танилцуулсан.

Монгол Улс Ази тивээс анх удаа энэхүү индексийг тогтоолгож байгаа нь онцлох үйл явдал юм.

Энэхүү индекс нь үнэлгээний чадавхын суурь түвшинг тодорхойлж, олон улсын түвшинд хүлээн зөвшөөрөгдсөн арга зүйг нэвтрүүлэх, мэргэжилтнүүдийг бэлтгэх, сургалт, зөвлөмж авах боломжийг бүрдүүлж байгаа юм.

Засгийн газар хөгжлийн бодлогын үр дүнг бодитой үнэлж, цаашдын бодлогоо оновчтой тодорхойлж хэрэгжүүлэхэд анхаарч, Засгийн газрын 2024–2028 оны үйл ажиллагааны хөтөлбөрт “Олон улсын үнэлгээний цогц систем (DME)-ийг хөгжүүлж, бодлогын баримт бичгүүдийн хэрэгжилтийн үнэлгээг боловсронгуй болгох” зорилтыг тусгасан.

Энэхүү индексийг тогтоосноор үнэлгээний тогтолцоог бэхжүүлж, хөгжлийн бодлогын үр дүн сайжирч, улмаар Монгол Улсын гадаад харилцаа, хамтын ажиллагаа өргөжих, дотоод болон гадаадын хөрөнгө оруулалтын таатай нөхцөл бүрдэх ач холбогдолтой юм.