Үндэсний манлай үйлдвэр “Жүр Үр” ХХК-ийн хамт олон Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд олгосон бага хүүтэй, урт хугацаатай хөнгөлөлттэй зээлд хамрагдаж, үйлдвэрийн шинэ байраа ашиглалтад оруулж нээлтээ хийлээ.
Нээлтийн үйл ажиллагаанд “Хүнсний хувьсгал” мэргэжлийн холбооны Удирдах зөвлөлийн гишүүд оролцон баяр хүргэж, Монгол Улсын түүх соёлын хосгүй дурсгалт зүйлийн зэрэглэлд бүртгэгдсэн олноо Марзан хэмээн алдаршсан Балдуугийн Шаравын “Монголын нэг өдөр” бүтээлийг дурсгал болгон гардууллаа.
Үйлдвэрийн нээлтийн үеэр “Жүр үр” ХХК-ийн Ерөнхий захирал Б.Мөнхзул:
“Монгол Улсын Ерөнхийлөгч Ухнаагийн Хүрэлсүхийн санаачилсан “Хүнсний хувьсгал” үндэсний хөдөлгөөний хүрээнд хүнс үйлдвэрлэгчдээ дэмжин ажилласан төрийн зөв бодлогын үр дүнд “Жүр Үр”-ийн хамт олны 27 жилийн хичээл зүтгэл, хөлс хүч, итгэл сэтгэл шингэсэн шинэхэн үйлдвэр маань нээлтээ хийж байна. “Хүнсний хувьсгал” үндэсний хөдөлгөөний хүрээнд гурилан бүтээгдэхүүний салбарыг анх удаа төрөөс бодлогоор дэмжсэнд манай салбарынхан баяртай байна. Энэ бол бодлогын гадна үлдсэн салбаруудыг хамруулж чадсан, цагаа олсон хөтөлбөр болсон” гэдгийг онцлон тэмдэглэв.
