Монгол Улсын Ерөнхийлөгч Ухнаагийн Хүрэлсүх Бүгд Найрамдах Итали Улсад төрийн айлчлал хийлээ.
Айлчлалын хүрээнд Ром хотноо “Итали-Монголын бизнес форум” зохион байгуулагдлаа.
Форумд Гадаад хэргийн сайд Б.Батцэцэг, Хүнс, Хөдөө, Аж ахуй, Хөнгөн үйлдвэрийн сайд М.Бадамсүрэн болон Итали улсын шадар сайд Антонио Таяани оролцож мэндчилгээ дэвшүүллээ. Айлчлалын хүрээнд Монгол Улс, Бүгд Найрамдах Итали Улстай тогтоосон найрсаг харилцаа, хамтын ажиллагааны түвшнийг хоёр шатаар алгасан ахиулж “Стратегийн түншлэл”-д хүргэсэн нь гадаад худалдааг нэмэгдүүлэхэд том түлхэц болж байгааг талууд дурдлаа.
Бизнес форумд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Ерөнхийлөгчийн Төсөл хөтөлбөрийн зохицуулалт, иргэний нийгмийн бодлогын зөвлөх Б.Жавхлан, МҮХАҮТ-ын ерөнхийлөгч Б.Лхагважав, хоёр орны төр, засгийн байгууллагууд, хөрөнгө оруулагчид, 70 гаруй аж, ахуйн нэгжийн төлөөлөл оролцлоо.
Форумын үеэр МҮХАҮТ болон Италийн худалдааны агентлаг хоорондын хамтран ажиллах тухай Санамж бичигт гарын үсэг зурлаа.
Ингэснээр Монгол Улс, Итали Улстай жижиг дунд үйлдвэрлэлээс эхлэн олон улсын худалдааны томоохон компани, корпораци хүртэл харилцан туршлага солилцож, цаашлаад түншлэх гарц нээгдэж байна. Монгол Улс байгалийн баялаг, хөдөө аж ахуй, аялал жуулчлал, сэргээгдэх эрчим хүчний салбарт өргөн нөөцтэй бол Итали улс өндөр технологи, үйлдвэрлэлийн чиглэлээр тэргүүлэгч туршлагатай. Эдгээр харилцан нөхөх давуу тал нь шинэ төслүүд эхлүүлэх, түншлэлийг гүнзгийрүүлэх суурь болж байна.
