Монгол Улсын Ерөнхийлөгч У.Хүрэлсүхийн БНИУ-д хийсэн төрийн айлчлалын хүрээнд олон улсад моцарелла бяслагаараа алдартай “Fattorie Garofalo” үйлдвэртэй танилцлаа.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяраар ахлуулсан хүнс, хөнгөн үйлдвэрлэлийн төлөөлөл Италийн Наполи хотноо 60 гаруй жилийн түүхтэй олон улсад моцарелла бяслаг, сүүн бүтээгдэхүүнээрээ алдартай “Fattorie Garofalo” үйлдвэртэй танилцлаа.
Тус үйлдвэр 15 мянган одос үхэртэй бөгөөд моцарелла болон шинэ сүүн бүтээгдэхүүнүүдийг үйлдвэрлэн, шууд хэрэглэгчдийн гарт өглөө бүр борлуулдаг. Өөрөөр хэлбэл, түүхий сүүг фермээсээ богино хугацаанд боловсруулдгаараа онцлогтой байна.
Италийн Наполи хотноо 7 үйлдвэртэй бөгөөд олон улсын хэмжээнд хамгийн том одос үхрийн сүү үйлдвэрлэгчдийн нэг юм. Жилд ойролцоогоор 38 сая литр сүүг 10 сая килограмм чийз болгон боловсруулж дотоодын хэрэгцээг хангахын сацуу 40 орчим улс руу экспортлодог байна.
Хөдөө аж ахуй, хүнсний үйлдвэрлэлийг хослуулан кластераар хөгжүүлж “Made in Italy” нэрийг брэнд болгоход ихээхэн хувь нэмэр оруулдаг томоохон үйлдвэрүүдийн нэг. Мөн эрчим хүчний хэрэглээгээ багасгах зорилгоор нарны болон биогаз систем хэрэгжүүлж, утааг бууруулахад хувь нэмрээ оруулдаг юм.
