Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөн орон даяар амжилттай хэрэгжиж эхлээд байна.
Тус хөдөлгөөний хүрээнд “Хүнсний хангамж, аюулгүй байдлын талаар авах зарим арга хэмжээний тухай” тогтоолын төслийг 2022 оны 06 дугаар сарын 17-ны өдөр Улсын Их Хурлын чуулганы нэгдсэн хуралдаанаар хэлэлцэн баталсан.
Ингэснээр тус салбарын эрх зүйн орчныг сайжруулах, урт хугацаатай хөнгөлөлттэй зээл олгох, хүний нөөц бүрдүүлж, боловсон хүчин бэлтгэх, мал амьтны халдварт болон гоц халдварт өвчингүй эрүүл бүс болох, ирэх 5 жилд гол нэрийн 19 төрлийн бүтээгдэхүүнээр дотоодын хэрэгцээгээ бүрэн ханган, бүс нутагт хүнс экспортлогч улс болох боломж бүрдэж байна.
Дээрх тогтоолд тусгагдсан заалтыг ажил хэрэг болгох зорилгоор Хүнсний төсөл хөтөлбөр хариуцсан алба байгуулж, албаны даргаар Ерөнхийлөгчийн Үйлдвэр, үйлчилгээний бодлогын зөвлөх, Доктор (Ph.D)., Профессор Ч.Даваабаяр томилогдсон юм.
Ч.Даваабаяр нь:
- 2015- 2022 он “Баялаг бүтээгчдийг дэмжих холбоо” ТББ-ын тэргүүн,
- 2015-2016 онд Хөдөлмөрийн сайдын зөвлөх,
- 2015-2016 онд Аж үйлдвэрийн яамны дэргэдэх Жижиг, дунд үйлдвэрийн үндэсний зөвлөлийн гишүүн,
- 2018-2019 онд Засгийн газрын дэргэдэх Төр, хувийн хэвшлийн зөвлөлдөх хорооны гишүүн,
- 2021-2022 он УИХ-ын гишүүний орон тооны бус зөвлөх,
- 2021-2022 он ШӨХТГ-ын дэргэдэх “Мэргэжлийн нэгдсэн холбоодын зөвлөл”-ийн дарга,
- 2022 онд Байгаль орчин, аялал жуулчлалын сайдын зөвлөхөөр тус тус ажиллаж байсан юм.
