Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хувьсгал” үндэсний хөдөлгөөний хүрээнд “Сүүн зайрмаг” ХХК-ийн үйлдвэрт ажиллалаа.

Тус үйлдвэр “Хүнсний хувьсгал”-д нэгдэн хөдөлгөөний зорилготой уялдуулж, үндэсний үйлдвэрлэлийг дэмжсэн, эрүүл, аюулгүй хүнсийг хэрэглэгчдэд хүргэхэд хувь нэмрээ оруулсаар байна.

“Сүүн зайрмаг” ХХК нь 2018 оноос эхлэн хүнсний хангамжийн тогтвортой байдлыг дэмжих, иргэдийн эрүүл хэрэглээг төлөвшүүлэх зорилгоор бүтээгдэхүүний найрлага, технологид шинэчлэл, сайжруулалтыг тогтмол хийж, сүүн зайрмаг, сүүн тараг брэндээрээ алдартай болсон үндэсний үйлдвэрлэгч, баялаг бүтээгч юм. Ингэхдээ уламжлалт цагаан идээ буюу өрөм, сүүн зайрмаг, тарагны зайрмаг зэргийг нэмэлт амт, өнгө оруулагчгүйгээр үйлдвэрлэн 21 аймагт 33, улсын хэмжээнд нийт 128 борлуулалтын цэгээр дамжуулан хэрэглэгчдэдээ түгээж байна.

80 орчим ажилтантай бөгөөд 2025 онд 2.5 тэрбумын хөрөнгө оруулалтаар шинэ үйлдвэртэй болж, цаашид тоног төхөөрөмжийн бүрэн автомат урсгалыг нэвтрүүлэхээр ажиллаж байна.

Ингэхдээ нийслэлээс 100 км доторх үхрийн фермүүдтэй хамтарч кластерын системээр ажилладаг юм.

Засгийн газрын 2020 оны “Журам батлах тухай” 130, 2023 оны “Тогтоол, тогтоолын хавсралтад нэмэлт, өөрчлөлт оруулах тухай” 363 дугаар тогтоолын хавсралтаар баталсан “Сүү боловсруулах үйлдвэр, цехэд техникийн зохицуулалтын шаардлагад нийцсэн малын түүхий сүү нийлүүлсэн малчин, эрчимжсэн мал аж ахуй эрхлэгчид мөнгөн урамшуулал олгох журам”-ын дагуу 2020 оноос эхлэн сэрүүний улирал (1, 2, 3, 11, 12 сар)-д үйлдвэр, цехэд нийлүүлсэн түүхий сүүний нэг литр тутамд 1000 төгрөгийн мөнгөн урамшууллыг олгож байна.

Үүнд тус “Сүүн зайрмаг” ХХК одоогоор хамрагдаж чадахгүй байгаа бөгөөд малчдаас түүхий эдээ авахдаа нэг литр сүү тутамд 1000 төгрөгийн нэмэгдэлтэй худалдаж авдаг байна. Уг асуудлыг хөдөө орон нутгийн сүүний жижиг цехүүд мөн дурдаж хууль, эрхзүйг эргэн харж зөв зохицуулалт хийхийг хүсэж байсан юм.